ކޮވިޑް-19 ފެނުނު 10 ރަށުގައި މާސްކު އެޅުން މަޖުބޫރުކޮށްފި
4 އޯގަސްޓު 2020 | އަންގާރަ 12:43ދިގު ދަތުރުތައް ކުރާނަމަ ދަތުރުމަތީގައި މާސްކް އެޅުން މަޖުބޫރު
ރާއްޖޭގެ މީހުން ދިރިއުޅޭ ރަށެއް. ރަށްރަށުގައި ދިރިއުޅޭ މީހުން މާސްކް އެޅުމަށް ވަނީ އިލްތިމާސްކޮށްފައި
އަތޮޅުތެރެއިން ކޮވިޑް-19 ގެ ކޭސްތައް ފެނިފައިވާ ދިހަ ރަށުގައި މާސްކު އެޅުން މަޖުބޫރު ކޮށްފިއެވެ.
ކޮވިޑް-19 ފެނިފައިވާ ރަށްތަކަކީ ހއ. ކެލާ، ހއ. އިހަވަންދޫ، ރ. އިނގުރައިދޫ، ބ. އޭދަފުށި، ބ. ހިތާދޫ، ބ. ކަމަދޫ، ޅ. ކުރެންދޫ، ޅ. ހިންނަވަރު، ކ. މާފުށީގެ އިތުުރުން ވ. ފުލިދޫއެވެ.
އަންގާރަ ދުވަހު ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ) ން ބޭއްވި ނޫސްވެރިންގެ ބައްދަލުވުމުގައި ޕޮލިސީ ޕްލޭނިންގެ އެންޑް އިންޓަނޭޝަނަލް ހެލްތްގެ ޑެޕިއުޓީ ޑިރެކްޓަރ ޖެނެރަލް އައިޝަތު ސާމިޔާ ވިދާޅުވީ މާލެ ފިޔަވާ އަތޮޅުތެރެއިން މިވަގުތު ދިހަ ރަށެއްގައި ކޮވިޑް-19ގެ ކޭސްތައް ފެނިފައިވާ ކަމަށް ރިޕޯޓްކޮށްފައިވާ ކަމަށާއި އެރަށްތަކުގައި ދިރި އުޅޭ ރައްޔިތުން ފޮތި މާސްކް އެޅުން މަޖުބޫރު ކަމަށެވެ.
ރަށްރަށަށް ބަލި ފެތުރުން ކޮންޓްރޯލް ކުރުމުގެ ގޮތުން ވައިގެ މަގުންނާއި ކަނޑު މަގުން މާލެ އިން ރަށްރަށަށްދާ ފަރާތްތަކުން ދިގު ދަތުރުތައް ކުރާނަމަ ދަތުރުމަތީގައި މާސްކް އެޅުން މަޖުބޫރު ކަމަށެވެ.
ސާމިޔާ ވިދާޅުވީ ފުރަބަންދު ކަރަންޓީންގައި ގިނަ އަދަދެއްގެ މީހުން މާލެ އިން ރަށްރަށަށް ގޮސްފައިވާ ކަމަށާއި ބަލި އަދި ދެނެނުގަނެވި ހުރުމަކީ ވެސް އެކަށީގެންވާ ކަމަށެވެ. އެހެންކަމުން ރައްކައުތެރިވުމުގެ ގޮތުން ރަށްރަށުގައި ފޮތި މާސްކު މިހާރުން ފެށިގެން ބޭނުން ކުރުމަށް ވަނީ އިލްތިމާސް ކުރައްވާފައެވެ.
