ޒަރޫރީ ބޭނުމެއްގައި މެނުވީ މާލެ އެރުން މަނާކޮށްފި

މާލޭގައި ކޮވިޑް-19 ފެތުރުން އިތުރުވަމުންދާނީ ޒަރޫރީ ބޭނުމެއްގައި މެނުވީ މާލެ އެރުން މަނާކޮށްފިއެވެ.

އަންގާރަ ދުވަހު ހެލްތް އިމަރޖެންސީ އޮޕަރޭޝަން ސެންޓަރ އިން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީޤް ވިދާޅުވީ އަތޮޅުތެރޭގައި ބަލި ފެތުރުން ކޮންޓްރޯލް ކުރުމަށްޓަކައި އަންގާރަ ދުަވހުން ފެށިގެން މާލެ އެރޭނީ ޚާއްސަ ހުއްދައެއްގެ ދަށުން ކަމަށެވެ.

މާލއިން ރަށަށް ދިއުމަށް ބޭނުންވާ ފަރާތްތަކަށް ހަމައެކަނި ހުއްދަ ދެވޭނީ ޒަރޫރީ ބޭނުމެއްގައި ނުވަތަ ސިއްޚީ ޚިދުމަތެއް ހޯދުމަށް ރަށުން މާލޭ އައިސް ތިބި ފަރާތްތަކަށް އަނބުރާ ރަށަށް ދިއުމަށް އެކަނި ކަމަށެވެ.

މާލެ އަންނަ ދޯނިތަކުން މާލެ، ހުޅުމާލެ އަދި ވިލިމާލެ އަށް އެރުމަށް މާލޭ ސިޓީ ކައުންސިލުން ވަކި ޚާއްސަ ތަންތަނެއް ކަނޑއަޅާނެ ކަމަށާއި އެނޫން ތަންތަނަށް އެ ދޯނިތައް ގާތް ކުރުމާއި މުދާ އަރުވާ ބޭލުން ވެސް މަނާވާނެ ކަމަށެވެ.

އެ ދޯނިތަކުގެ ފަޅުވެރިން ވެސް މާލެ އަރާ ފޭބުމާއި ކަންތައްތަކަށް އިތުރު ރެސްޓްރިކްޝަންސް ތަކެއް ވެސް އަންނާނެ ކަމަށް ޑރ. ނަޒްލާ ވިދާޅުވިއެވެ.

ކޮވިޑް-19 އާއި ގުޅިގެން މާލެ ސަރަހައްދުގައި އަޅާފައިވާ ފިޔަަޅުތަކަށް ދިން ލުއިތަކުގެ ތެރޭގައި މާލެއަށް އަންނަން ބޭނުންވާ މީހުންނަށް މާލެއަށް އައުމުގައި އެއްވެސް ހުއްދައެއް ބޭނުންނުވެއެވެ. ނަމަވެސް މާލެއިން ރަށްރަށަށް ދާމީހުން ދިއުމުގައި ނަގަންޖެހޭ ހުއްދަ ނަގައި ދާންބޭނުންވާ ރަށަކަށް ދިއުމަށްފަހު 14 ދުވަހުގެ ހޯމް ކަރަންޓީން ފުރިހަމަ ކުރަންޖެހެއެވެ.