މާޅޮހުގައި އިމާރާތްކުރި ބޯޅަގޭގެ މަސައްކަތް ނިންމާލައިފި

އއ. މާޅޮހުގައި ކުޅިވަރާ ބެހޭ ވުޒާރާއިން އިމާރާތްކުރި ބޯޅަގޭގެ މަސައްކަތް ނިންމާލާފިއެވެ.

ކުޅިވަރާ ބެހޭ ވަޒީރު އަޙްމަދު މަޙްލޫފް ހޯމަ ދުވަހު ކުރެއްވި ޓްވީޓެއްގައި ވިދާޅުވީ އއ. މާޅޮސް ބޯޅަގޭގެ މަސައްކަތް ނިންމާލާފައިވާ ކަމަށާއި، މިކަމުގައި އެއްބާރުލުންދެއްވި އެ ރަށު ޒުވާނުންނާއި، އެ ރަށު ކައުންސިލާއި އަދި އއ. މަތިވެރި ދާއިރާގެ މަޖިލީސް މެންބަރު ހަސަން ޒަރީރު ދެއްވި އެއްބާރުލުމަށް ޝުކުރު އަދާކުރައްވާ ކަމަށެވެ.

މާޅޮސް ބޯޅަގޭގެ މަސައްކަތަކީ އެ ރަށު ކައުންސިލުން ސިލްވާ ގްރޫޕާ ހަވާލުކޮށްގެން ކުރިއަށްގެންދިޔަ މަޝްރޫއެކެވެ. މި މަޝްރޫއަށް ކުޅިވަރާ ބެހޭ ވުޒާރާއިން ވަނީ 1،166،000 (އެއް މިލިޔަން އެއްލައްކަ ފަސްދޮޅަސް ހަ ހާސް) ރުފިޔާ ޚަރަދުކޮށްފައެވެ.

ކުޅިވަރާ ބެހޭ ވުޒާރާއިން މާޅޮހުގައި އިމާރާތްކުރި ބޯޅަގޭގެ މަސައްކަތް ނިންމާލިއިރު، އެ ވުޒާރާގެ ފަރާތުން ރާއްޖޭގެ އެކި ކަންކޮޅުތަކުގައި މިހާރު ކުރިއަށްގެންދާ ގިނަ މަޝްރޫއުތައް ވަނީ ނިމުމަކާ ހަމަޔަށް އައިސްފައެވެ. އެގޮތުން ގިނަ ރަށްތަކެއްގައި އެޅި ފުޓްސަލް ދަނޑުގެ މަސައްކަތްތައް ނިންމާލާފައިވާއިރު، ކުރިއަށް އޮތް ދުވަސްތަކުގައި ވެސް ގިނަ މަޝްރޫއުތަކެއް ނިމިގެންދާނެ ކަމަށް އެ ވުޒާރާއިން މައުލޫމާތުދެއެވެ.