ކޮވިޑް-19 އާ ގުޅިގެން 5 ރަށެއް މޮނިޓަރިންގެ ޙާލަތަށް ގެނެވިފައިވާކަމަށް ހެލްތް އިމަރެޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.

ހޯމަ ދުވަހުގެރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޗްއީއޯސީގެ ތަރުޖަމާނު ޑޮކްޓަރ ނަޒްލާ ރަފީޤު ވިދާޅުވީ، ކޮވިޑް-19 އާ ގުޅިގެން މިވަގުތުވެސް 5 ރަށެއް މޮނިޓަރިންގެ ޙާލަތުގައި ވާ ކަމަށެވެ. އޭގެ ތެރޭގައި ހިމެނެނީ ހއ. އިހަވަންދޫ, ހއ. މާރަންދޫ، ހ.ދ. ނޮޅިވަރަން، ހދ. ފިނޭ އަދި ހދ އަތޮޅު މަކުނުދޫ އެވެ.

އޭގެއިތުރުން، މިވަގުތުވެސް ކޮވިޑް-19 ގެ އެކްޓިވް ކޭސްތައް ފެނިފައިވާ އެހެން ނަމަވެސް މޮނިޓަރިންގެ ޙާލަތުގައި ނެތް ރަށްރަށުގެ މައުލޫމާތުތައްވެސް އެޗްޕީއޭއިން ހިއްސާ ކޮށްފައިވެއެވެ. އޭގެ ތެރޭގައި ހއ އަތޮޅުގެ ރަށްތަކާއި، ރ އަތޮޅާއި، ބ އަތޮޅުގެ އިތުރުން، ކ އަތޮޅާއި، ވ އަތޮޅާއި، ޅ އަތޮޅާއި، ބައެއް ރިސޯޓުތައްވެސް ހިމެނެއެވެ.

ކޮވިޑް-19 އާ ގުޅިގެން މީގެ ކުރިންވެސް ބައެއް ރަށްރަށް މޮނިޓަރިންގެ ޙާލަތަށް ގެނެވިފައިވެއެވެ.