ބޯޑަރު ހުޅުވިތާ 17 ދުވަސްތެރޭ ރާއްޖެއައި 1769 ފަތުރުވެރިން
އެންމެ ގިނައިން މީހުން ޒިޔާރަތްކުރީ އިނގިރޭސިވިލާތުން
ބޯޑަރު ހުޅުވާލި ދުވަހު ރާއްޖެއަށް ޒިޔާރަތްކުރި ފަތުރުވެރިންނަށް އެމްއޭސީއެލްގެ މުވައްޒަފުން މަރުހަބާ ކިޔާނީ
ބޯޑަރު ހުޅުވިތާ 17 ދުވަސްތެރޭ ރާއްޖެއައި 1769 ފަތުރުވެރިންކަމަށް އިމިގްރޭޝަންގެ ތަފާސް ހިސާބުތަކުން ދައްކައިފިއެވެ.
ކޮވިޑް-19 އިން ރައްކާތެރިވުމުގެ ގޮތުން ރާއްޖޭގެ ބޯޑަރުތައް ބަންދުކޮށްފައި އޮތް އޮތުން ނިމުމަކަށް ގެނެސް ބޯޑަރުތައް އަލުން ހުޅުވާލީ ޖުލައި މަހުގެ 15 ވަނަ ދުވަހުއެވެ. އިމިގްރޭޝަނުން ވަނީ ޖުލައި 15ން ޖުލައި 31 ނިޔަލަށް ރާއްޖެ ޒިޔާރަތްކުރި ފަތުރުވެރިންގެ ތަފާސް ހިސާބުތައް އާއްމުކޮށްފައެވެ. އެ މުއްދަތުގައި ރާއްޖެ އަށް އެންމެ ގިނައިން ފަތުރުވެރިން ޒިޔާރަތްކުރީ އިނގިރޭސިވިލާތުންނެވެ.
އިނގިރޭސިވިލާތުން 258 ފަތުރުވެރިޔަކު އައިސްފައިވާއިރު، ދެ ވަނަ އަަށް އެންމެ ގިނައިން މީހުން ޒިޔާރަތްކުރި އެމެރިކާއިން ރާއްޖެ އައީ 189 ފަތުރުވެރިންނެވެ. ތިން ވަނަ އަށް އެންމެ ގިނަ ފަތުރުވެރިން ޒިޔާރަތްކުރީ ޔޫއޭއީއިންނެވެ. އެއީ 143 ފަތުރުވެރިންނެވެ.
ހަތަރު ވަނަ އަށް އެންމެ ގިނައިން ޒިޔާރަތްކުރީ ޖަރުމަނު ވިލާތުންނެވެ. އެއީ 135 ފަތުރުވެރިންނެވެ. ސްވިޒަލޭންޑުން 79 ފަތުރުވެރިން ޒިޔާރަތްކޮށްފައިވާއިރު ސްޕޭއިން އިން ޒިޔާރަތްކުރީ 62 ފަތުރުވެރިންނެވެ. ޖުލައި 31 ނިޔަލަށް ރަޝިޔާއިން ޒިޔާރަތް ކޮށްފައިވަނީ 58 ފަތުރުވެރިންނެވެ.
އާއްމު ގޮތެއްގައި އެންމެ ގިނައިން ފަތުރުވެރިން ޒިޔާރަތްކުރާ އިޓަލީން އައީ 44 ފަތުރުވެރިންނެވެ. ފިލިޕީންސްގެ 43 ފަތުރުވެރިޔަކު ވަނީ ރާއްޖެ އަށް ޒިޔާރަތްކޮށްފައެވެ. އަދި އެހެނިހެން ގައުމުތަކުން 700 ފަތުރުވެރިން ވަނީ މި މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައެވެ. އިމިގްރޭޝަނުން އާއްމުކޮށްފައިވާ ތަފާސްހިސާބުތަކަށް ބަލާއިރު އެންމެ ގިނައިން ފަތުރުވެރިން ޒިޔާރަތްކޮށްފައިވަނީ ޖުލައި މަހުގެ 30 ވަނަ ދުވަހެވެ.
