އިޓަލީން ރާއްޖެއައި 2 ދިވެހިން ކަރަންޓީނަށް

އިޓަލީގެ ރޯމް އިން ރާއްޖެ އައި ދެ ދިވެހިން ކަރަންޓީން ކުރުމުގެ މަސައްކަތް ކުރަމުންދާ ކަމަށް ހެލްތް ޕްރޮޓެކްސް އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން ބުދަ ދުވަހު ކޮށްފައިވާ ޓްވީޓްގައި ވަނީ ރައްކާތެރިކަމުގެ ގޮތުން އަމަލު ކުރަމުންދާ އުޞޫލުގެ ދަށުން، އިޓަލީ ވިލާތުގެ ރޯމްއިން ފުރައިގެން ބުދަ ހެނދުނު އެނބުރި ރާއްޖެ އައި 2 ދިވެހިން 14 ދުވަހުގެ މުއްދަތަކަށް ކަރަންޓީން ކުރުމުގެ މަސައްކަތްތައް ކުރެވެމުންދާ ކަމަށެވެ.

މިހާރު ދުނިޔޭގައި ހަލުވިކަމާއި އެންމެ ގިނައިން ކޯވިޑް-19 ފެތުރެމުންދާ ގައުމަކީ އިޓަލީ ވިލާތެވެ.

އިޓަލީގައި ކޯވިޑް-19 ފެތުރެމުންދިއުމާއި ގުޅިގެން އެ ޤައުމު ވަނީ ލޮކްޑައުން ކޮށްފައެވެ.

އިޓަލީގައި ޢާންމު އެއްވުންތައް ބޭއްވުންވެސް މިހާރު ވަނީ މަނާކޮށްފައެވެ. އަންގާރަ ދުވަހުން ފެށިގެން ދަތުރު ކުރުމަށް ހުއްދަދެނީ ވަޒީފާއަށާއި، ޢާއިލީ ކަމެއް މެދުވެރިވެގެން އެކަންޏެވެ.

މިގޮތަށް ނިންމާފައި މިވަނީ މުޖްތަމަޢުގައި ނާޒުކުޙާލަތްތަކުގައި ދިރިއުޅޭ މީހުން މި ވައިރަސްއިން ރައްކާތެރިކުރުމުގެ ބޭނުމުގައެވެ.

އެޗްޕީއޭ އިން މައުލޫމާތު ދޭ ގޮތުގައި ވިލިވަރުގައި 9 މީހަކު ވަނީ ކަރަންޓީން ކުރެވިފައެވެ.

މީގެ އިތުރުން ފަރުކޮޅުފުށީ އައިސޮލެޝަންގައި 15 މީހަކު ތިބިކަމަށް އެޗްޕީއޭ އިން މައުލޫމާތު ދެއެވެ.