މިދުވަސްވަރު ކަށުކަމާކެމީގެ ކަންކަން ލަސް ނުކޮށް، އަވަހަށް ނިންމުމަށް އެދިއްޖެ
ޖަމާޢަތްތެރިން އެގޮތަށް އެކަން ކުރަމުން ދާނެ
މާލެ ސިޓީގެ މިސްކިތްތަކުގެ ތެރެއިން، މާލޭގައި ކަށު ނަމާދު ކުރާނީ އާސަހަރާގައި
ކޮވިޑް-19 ގެ މި ޙާލަތުގައި މަރުވާ މީހުންގެ ކަށުކަމާކެމީގެ ކަންކަން ވީހާވެސް އަވަހަށް ނިންމުމަށް މާލޭ ސިޓީ ކައުންސިލުން އަންގައިފިއެވެ.
މާލޭ ސަރަހައްދުގައި ކަށުކަމާކެމީގެ ކަންކަން ކުރުމާއި އަދި ކަށުނަމާދު ކުރުމާ ބެހޭ ގޮތުން މާލޭ ސިޓީ ކައުންސިލުން ނެރުނު އިއުލާނެއްގައި ބުނީ، މި ދުވަސްވަރު ޚާއްސަކޮށް މައްޔިތާ އާސަހަރާއަށް ގެނައުމަށްފަހު، ވީއެންމެ އަވަހަކަށް މައްޔިތާގެ ކަށުކަމާކެމީގެ ކަންތައްތައް ނިންމުމަށްފަހު، މައްޔިތާ ވަޅުލުމަށް ޢާއިލާގެ ފަރާތުން އިސްކަންދޭން ވާނެ ކަމަށެވެ. އަދި ޖަމާޢަތްތެރިން އެގޮތަށް އެކަން ކުރަމުން ދާނެ ކަމަށް ބުނެފައިވެއެވެ.
އޭގެ އިތުރުން، މައްޔިތާ އާސަހަރާއަށް ގެނައުމަށްފަހު، ހިނަވާގޭގައި މައްޔިތާ ބޭއްވޭނީ ގިނަވެގެން 3 ގަޑި އިރުވަންދެން ކަމަށާއި، ޖަނާޒާގައި ބައިވެރިވުމަށް ޒިޔާރަތް ކުރައްވާ ފަރާތްތަކުން، ހިނަވާގެ އެތެރެއާއި ސަހަރާގެ ގޯތިތެރޭގައި އުޅޭއިރު، ޢިޖުތިމާޢީ ގައިދުރުކަން ބެހެއްޓުމަށާއި، އެޗް،ޕީ.އޭ ގެ އުޞޫލުތަކާއި އެއްގޮތަށް ޢަމަލުތައް ބެހެއްޓުމަށް އެދިފައިވެއެވެ.
މާލޭ ސިޓީ ކައުންސިލުން ބުނީ، މާލެ ސިޓީގެ މިސްކިތްތަކުގެ ތެރެއިން، މާލޭގައި ކަށު ނަމާދު ކުރާނީ، "މަސްޖިދުއް ތަޢާވުނި" (އާސަހަރާ މިސްކިތް) ގައި ކަމަށާއި، ކަށުނަމާދު ކުރެވޭނީ ފަރުޟު ނަމާދުގެ ޖަމާޢަތާއި ދިމާނުވާގޮތަށް، ނަމާދަށް ބަންގި ގޮވާ ވަގުތުން ފެށިގެން ބައިގަޑިއިރު ފަހުން ކަމަށެވެ.
އަދި ކޮޑިވް ބަލީގައި ނިޔާވާ މީހުންގެ ކަށުނަމާދު ކުރާނީ ހުޅުމާލެ ސަހަރާ ގޯތިތެރޭ (ހިނަވާގެ ފެންޑާ) ގައި ކަމަށް ސިޓީ ކައުންސިލުން ވަނީ ބުނެފައެވެ.
