ޗައިނާއަށް ގެންގޮސްދާނެކަމުގެ ބިރަށް ހޮންކޮންގަށް މީހުން އެކްސްޓްރަޑައިޓް ކުރުން ހުއްޓާލަނީ

ހޮންކޮންގާއެކު ހަދާފައިވާ އެކްސްޓްރަޑިޝަން އެއްބަސްވުންތަން ގިނަ ގައުމުތަކަކުން ސަސްޕެންޑްކޮށްފިއެވެ.

ކުށެއްގެ ތުހުމަތުގައި ހޮންކޮންގުން ބޭނުންވެއްޖެ ހިނދެއްގައި އެހެން ގައުމުތަކުން މީހުން ހައްޔަރުކޮށް، ހޮންކޮންގަށް ތަހުގީގަށް ނުވަތަ ޝަރީޢަތަށް ހާޒިރުކުރެވޭ މި އެއްބަސްވުންތައް އުވާލުމަށް ނިންމި ގައުމުތަކުގެ ތެރޭގައި ހިމެނެނީ ޖަރމަނީ، އޮސްޓްރޭލިއާ، ކެނެޑާ، ނިއުޒިލޭންޑް، އިނގިރޭސިވިލާތް އަދި އެމެރިކާއެވެ. އެގައުމުތަކުން ހޮންކޮންގާއެކު ހަދާފައިވާ ކުށްވެރި ބަދަލުކުރުމުގެ އެއްބަސްވުމަށް އަމަލުކުރުން މެދުކަނޑާލީ ހޮންކޮންގްގެ މައްޗަށް ޗައިނާގެ ނުފޫޒު ގަދަވެ، އަލަށް ހެދި ގާނޫނުތަކެއްގެ ނަހަމަ ބޭނުންކޮށްގެން ހޮންކޮންގަށް އެގޮތަށް ގެންދާ މީހުން ޗައިނާއަށް ގެންގޮސްފާނެކަމުގެ ބިރަށެވެ.

ހޮންކޮންގާއެކު ހަދާފައިވާ އެކްސްޓްރަޑިޝަން އެއްބަސްވުމަށް އަމަލުނުކުރަން އެންމެ ފަހުން ނިންމީ ޖަރމަނީ އިންނެވެ. އެނިންމުމާ ގުޅިގެން ބަރލިންގައި ހުންނަ ޗައިނާ އެމްބަސީއިން ވަނީ އެކަން ކުށްވެރިކޮށް، ޖަރމަނީގެ ފޮރިން މިނިސްޓަރ ހެއިކޯ މާސްއަށް ވަރަށް ބޮޑަށް ފާޑު ކިޔާފައެވެ.

ހޮންކޮންގެ މައްސަލަ ބޮޑުވެ، ޗައިނާއިން ހޮންކޮންގަށް ދީފައިވާ މިނިވަންކަމަށް އަރައިގެންފައިވާ މައްސަލަ ބައިނަލްއަގްވާމީ މުޖްތަމައުން ކުށްވެރިކުރަމުން ދަނިކޮށް ހޮންކޮންގްގެ އާއްމު އިންތިޚާބަށް ކުރިމަތިލި ޑިމޮކްރެޓިކް ފިކުރުގެ 12 ކެންޑިޑޭޓެއްގެ ކެންޑިޑެސީ ވަނީ ބާތިލްކޮށްފައެވެ. އަދި އިންތިޚާބު ވެސް މިހާރު ވަނީ ފަސްކޮށްފައެވެ.