ޝަރީއަތަށް ޗައިނާއަށް ފޮނުވާލަން ހުށައެޅުމުން ހޮންގކޮންގގައި މުޒާހަރާކޮށްފި

ކުށުގެ ތުހުމަތު ކުރެވޭ ފަރާތްތަކުގެ ޝަރީއަތްތައް ހިންގުމަށް ޗައިނާއަށް ފޮނުވާލެވޭ ގޮތަށް (އެކްސްޓްރެޑޭޓް ކުރެވޭ ގޮތަށް) ހޮންގ ކޮންގގެ ގާނޫނަށް ބަދަލު ގެންނަން ހުށައެޅުމުން، އެ ގައުމުގެ ރައްޔިތުން ނިކުމެ މުޒާހަރާކޮށްފިއެވެ.

އާދިއްތަ ދުވަހު ހޮންގ ކޮންގގެ މަގުތަކުގައި ކުރި މުޒާހަރާ އިންތިޒާމް ކުރި ފަރާތްތަކުން ބުނީ، ބައި މިލިއަނަށް ވުރެ ގިނަ މީހުން މުޒާހަރާގައި ބައިވެރިވެފައިވާ ކަމަށެވެ. އެ ފަރާތްތަކުން ބުނީ މިއީ 2003 ވަނަ އަހަރުގެ ތެރޭގައި އެ ގައުމުގެ ގައުމީ ސަލާމަތާ ބެހޭ ގާނޫނުތައް ބަދަލުކުރަން ހުށައެޅުމުން މުޒާހަރާކުރަން ނިކުތް މީހުންނަށް ވުރެ ވެސް ގިނައިން މީހުން ބައިވެރިވީ މުޒާހަރާއެއް ކަމަށެވެ. އެ ފަހަރުގެ މުޒާހަރާގައި ވެސް ބައި މިލިއަނެއްހާ މީހުން ބައިވެރިވެފައިވެއެވެ.

އެފަހަރުގެ މުޒާހަރާތަކާ ގުޅިގެން ގާނޫނަށް ހުށައެޅި ބަދަލުތައް އަނބުރާ ގެންދަން ސަރުކާރުން ނިންމާ، އޭރުގެ ސަރުކާރުގެ އިސް އޮފިޝަލަކު އިސްތިއުފާ ދެއްވަން މަޖުބޫރުވެ ވަޑައިގެންނެވިއެވެ. އާދިއްތަ ދުވަހުގެ މުޒާހަރާތަކާއި ގުޅިގެން އެ ގައުމުގެ ޗީފް އެގްޒެކެޓިވް ކެރީ ލޭމްއަށް ވެސް އަވަސް ނިންމުންތަކެއް ނިންމަން ޖެހޭނެ ކަމަށް ވަނީ ބެލެވިފައެވެ.

މުޒާހަރާގެ ބައިވެރިންނާ މުޙާތަބުކޮށް ދެއްކެވި ވާހަކަފުޅުގައި ގާނޫނު ހަދާ މަޖިލީހުގެ މެމްބަރެއް ކަމުގައިވާ ޑިމޮކްރެޓިކް ޕާޓީގެ ޖޭމްސް ޓޯ ވިދާޅުވީ، މުޅި ހޮންގ ކޮންގ އޮތީ ކެރީއާ ދެކޮޅަށް ކަމަށެވެ. އަދި އެކްސްޓްރެޑިޝަން ބިލް އަނބުރޭ ނެންގެވުމަށް ފަހު، އިސްތިއުފާ ދެއްވުމަށް ވެސް ޓޯ ގޮވާލެއްވިއެވެ.

ހޮންގ ކޮންގއަކީ ޗައިނާގެ ހާއްސަ އިދާރީ ސަރަހައްދެއްގެ ގޮތުގައި ކަނޑައަޅާފައި އޮންނަ ގައުމެކެވެ. އިނގިރޭސިންގެ އިސްތިއުމާރުގެ ދުވަސްވަރު, ސަތޭކަ އަހަރުގެ އެއްބަސްވުމެއްގެ ދަށުން އެ މީހުންގެ ދަށުގައި އޮތުމަށް ފަހު، އެ ސަރަހައްދު އަނބުރާ ޗައިނާއާ ހަވާލުކުރެވުނީ 1997 ވަނަ އަހަރުގެ ތެރޭގައެވެ. ޗައިނާގެ ހާއްސަ އިދާރީ ސަރަހައްދެއްގެ ގޮތުގައި ކަނޑައަޅާފައި އޮތުމުން، ހޮންގ ކޮންގއަށް ވަނީ އަމިއްލަ ސަރުކާރުގެ ހިންގުމުގެ ނިޒާމަކާއި އިގްތިސާދެއް ހިންގުމުގެ މިނިވަންކަން ދީފައެވެ.