ހަނގުރާމަވެރި ޖަމާއަތްތަކުން ހަމަލާދޭނެ ކަމަށް ބުނުމާ ގުޅިގެންނާއި ވޯޓު ކަރުދާސްތައް އެކި ސަރަހައްދުތަކަށް ފޮނުވުމުގައި ލަސްވެގެން ހަފުތާއެއް ވަންދެން ފަސް ކުރެވުނު ނައިޖީރިޔާގެ ރިޔާސީ އިންތިހާބުގެ ވޯޓުލައި ނިމި، ވޯޓު ފޮށިތައް ބަންދުކޮށްފިއެވެ.

ވާދަވެރިވާނެ ކަމަށް ބެލެވޭ އިންތިހާބުގައި ވޯޓުލުމަށް ގިނަ އަދަދެއްގެ ބަޔަކު ވަނީ ވޯޓުލާން ކިޔު ހަދާފައެވެ. އެގޮތުން ވެރިރަށް އަބޫޖާގައި ވޯޓު ލާން ފެށުމުގެ ތިން ގަޑިއިރު ކުރިން މީހުން ވަނީ ސަފުތައް ހަދާފައެވެ. އަދި ވޯޓު ލުމަށް ފަހު ވެސް ބައެއް ފަރާތްތަކުން ވަނީ ވޯޓުލާ މަރުކަޒުތަކުގައި ގިނަ އިރުތަކެއް ވަންދެން މަޑުކޮށްފައެވެ.

އާބާދީގައި 200 މިލިއަން މީހުން ހިމެނޭ ނައިޖީރިޔާގެ އިންތިހާބުގައި 120000 (އެއްލައްކަ ވިހިހާސް) ވޯޓުލާ މަރުކަޒެއްގައި ވޯޓުލާފައިވާ އިރު، ވޯޓު ލުމުގެ ހައްގު ލިބިފައިވާ 84 މިލިއަން މީހުން ވަނީ ރަޖިސްޓްރީކޮށްފައެވެ. ނައިޖީރިޔާގެ ރައީސްކަމަށް 73 ފަރާތަކުން ވަނީ ކުރިމަތިލައްވާފައެވެ. އަދި އެ ގައުމުގެ އިލެކްޝަންސް ކޮމިޝަނުން ބުނެފައި ވަނީ އަންނަ ހަފުތާގެ ތެރޭގައި އިންތިހާބުގެ ނަތީޖާ އިއުލާން ކުރެވޭ ވަރު ވާނެ ކަމަށެވެ.

ވޯޓުލުން ކުރިޔަށް ދިޔަ ވަގުތު އެ ގައުމުގެ އެކި ސަރަހައްދުތަކުގައި ހަނގުރާމަވެރި ޖަމާއަތްތަކުން ވަނީ ބޮން ގޮއްވާ ބަޑީގެ ހަމަލާ ދީފައެވެ. އަދި ދެ މީހަކު މަރާލާފައިވާ ކަމަށް ވެސް އެ ގައުމުގެ މީޑިއާތަކުން ވަނީ ރިޕޯޓްކޮށްފައެވެ. މީގެ އިތުރުން ލާގޯސްގައި ވޯޓުލާން ދިޔަ ބައެއް މީހުން ފައްސާލާފައިވާ އިރު، އެ ތަނުގައި ހުރި ބައެއް ކަރުދާސްތައް ހަނގުރާމަވެރިން ވަނީ ނައްތާލާފައެވެ.

ނައިޖީރިޔާގެ ރިޔާސީ އިންތިހާބު ކާމިޔާބު ކުރައްވާނެ ކަމަށް ބެލެވިފައި ވަނީ މިހާރުގެ ރައީސް މުހައްމަދު ބުހާރީ އަދި އިދިކޮޅު ލީޑަރު އަތިކު އަބޫބަކަރއާއި ދެ ބޭފުޅުންގެ ތެރެއިން ބޭފުޅެކެވެ. ދެ ކެނޑިޑޭޓުން ވެސް ވަނީ އިންތިހާބު ކާމިޔާބުވުމުގެ އުއްމީދު ބޮޑުކަމަށް ތަކުރާރުކޮށް ވިދާޅުވެފައެވެ.