ޓްރާންސްޕޯޓް އޮތޯރިޓީ، ކުރީގެ ސްޓަރ ސިނަމާ ހުރި އިމާރާތަށް ބަދަލުކޮށްފި
އަލުން ސަރުކާރު ހުޅުވޭއިރު، ޓްރާންސްޕޯޓް އޮތޯރިޓީގެ ހިދުމަތް ލިބެމުންދާނީ އައު އޮފީހުން
ޓްރާންސްޕޯޓް މިނިސްޓަރ އާއިޝަތު ނަހުލާ އަދި ޓްރާންސްޕޯޓް އޮތޯރިޓީގެ އިސް ބޭފުޅުން
މޯލްޑިވްސް ޓްރާންސްޕޯޓް އޮތޯރިޓީ ކުރީގެ ސްޓަރ ސިނަމާ ހުރި އިމާރާތަށް ބަދަލުކޮށްފިއެވެ.
މޯލްޑިވްސް ޓްރާންސްޕޯޓް އޮތޯރިޓީން ބުނެފައިވާ ގޮތުގައި، އަލްހާ ޢީދު ބަންދަށްފަހު، މި މަހުގެ 4 ވަނަ ދުވަހުން ފެށިގެން އެ އޮތޯރިޓީ ހިންގަމުންދާނީ ކުރީގެ ސްޓަރ ސިނަމާ ހިންގި މ. ޗަނބޭލީވިލާގެ ފުރަތަމަ ފަންގިފިލާގައެވެ.
ޓްރާންސްޕޯޓް އޮތޯރިޓީ މީގެ ކުރިން ހިންގަމުންދިޔައީ ހުރަވީ ބިލްޑިންގގެ ފުރަތަމަ ފަންގިފިލާގައެވެ. ނަމަވެސް އެތަނުގެ ޖާގައިގެ ދަތިކަމުގެ އިތުރުން، އެ ޢިމާރާތް ބައުކަމުގެ ޝަކުވާއަކީ ބައެއް ފަރާތްތަކުން ކުރަމުން އަންނަ ޝަކުވާ އެކެވެ. ހާއްސަކޮށް، އެތަނުގައި ހިންގަމުންދާ ބައެއް އިދާރާތަކާއި އެއިދާރާތަކުން ހިދްމަތް ހޯދަންދާ ބައެއް ފަރާތްތަކުގެ ޝަކުވާ ބޮޑުކަން ފާހަގަކުރެވެއެވެ.
ކުރީގެ ސްޓާރ ސިނަމާ ހުންނަ އިމާރާތް މިހާރު ވަނީ ރަނގަޅު ފެންވަރަކަށް ހަދާފައެވެ. އެއިމާރާތުގައި ބޭންކް އޮފް މޯލްޑިވްސް (ބީއެމްއެލް) ގެ ބްރާންޗެއް ވެސް ހުރެއެވެ. މާފަންނު ކޮޅު، ސޯޝަލް ސެންޓަރ، ކައިރީ ހުންނަ މި އިމާރާތަކީ، ކުރިން ފިލްމީ ދާއިރާގައި ފިލްމް އުފެއްދުމުގައި އިސްކޮށް އުޅުއްވި އަސްލަމް ރަޝީދުގެ އާއިލާގެ ގެއެއް ކަމަށް ވެއެވެ.
މޯލްޑިވްސް ޓްރާންސްޕޯޓް އޮތޯރިޓީއަކީ ރާއްޖޭގެ އެއްގަމާއި، ކަނޑު ދަތުރުފަތުރުގެ ދާއިރާ ތަރައްޤީކޮށް ކުރިއެރުވުމަށް ސަރުކާރުން އެކަށައަޅާ ސިޔާސަތުތައް ވިލަރެސްކޮށް، އެފަދަ ސިޔާސަތުތައް ކުރިއެރުވުމަށް މަސައްކަތްކުރާ މައި އިދާރާއެވެ.
އެއްގަމާއި ކަނޑުގެ އުޅަނދުތައް ރެޖިސްޓްރީ ކުރުމާއި ލައިންސަންސް ދޫކުރުމާއި، ޓްރާންސްޕޯޓާ ގުޅޭ އެކިއެކި ހުއްދަތައް ދޫކުރަމުންދަނީ ޓްރާންސްޕޯޓް އޮތޯރިޓީންނެވެ. އެގޮތުން ޝިޕިން އެޖެންސީ ރެޖިސްޓްރީ ކޮށްދިނުމުގެ ހިދްމަތް ދެމުން ދަނީ ވެސް ޓްރާންސްޕޯޓް އޮތޯރިޓީންނެވެ.
