ކަލާފާނު ސްކޫލުގެ ހުރިހާ ޓީޗަރުން ގޫގުލް އެޑިއުކޭޓަރުންގެ ފާސް ހޯދައިފި
2 އޯގަސްޓު 2020 | އާދީއްތަ 04:47105 ޓީޗަރުން ވަނީ ފާސް ހޯދާފައި
ތަމްރީން ފުރިހަމަ ކުރި ކަލާފާނު ސްކޫލުގެ ޓީޗަރުން
ކަލާފާނު ސްކޫލުގެ ހުރިހާ ޓީޗަރުން ގޫގުލް އެޑިއުކޭޓަރުންގެ ފާސް ހޯދައިފިއެވެ.
ކަލާފާނު ސްކޫލުން ބުނީ، ސްކޫލުގައި ހިމެނޭ 105 ޓީޗަރުންނާއ، ސްކޫލް މެނޭޖްމެންޓް ޓީމުގެ 18 މުވައްޒަފަކު ގޫގުލް އެޑިއުކޭޓަރުންގެ ފާސް ހޯދާފައިވާ ކަމަށް ކަލާފާނު ސްކޫލުން ބުންޏެވެ. އަދި ސްކޫލުގެ ހުރިހާ ޓީޗަރުން ގޫގުލް އެޑިއުކޭޓަރުންގެ ފާސް ހޯދުމަކީ ލިބޭ ފަޚުރެއް ކަމަށާއި، ލިބޭ ވަރަށް ބޮޑު ކުރިއެރުމެއް ކަމަށް އެ ސްކޫލުން ވަނީ ބުނެފައެވެ.
ކޮވިޑް-19އާ ގުޅިގެން މިހާރު ސްކޫލުތަކުގައި އޮންލައިންކޮށް ކިޔަވައިދެމުންދާއިރު، ގޫގްލް ކްލާސްރޫމްސްއަކީ މިހެން ދަރިވަރުންނަށް ކިޔަވައިދިނުމަށް ޓީޗަރުން ބޭނުންކުރާ މަންސައެވެ.
ގޫގްލް ކްލާސްރޫމުގައި ކިޔަވައިދޭން ބޭނުންވާ ޓީޗަރުން ގޫގުލް އެޑިއުކޭޓަރުންގެ ފާސް ހޯދަން ޖެހެއެވެ. އޮންލައިންކޮށް ކިޔަވައިދެވޭނެ ޓީޗަރުން ތަމްރީން ކުރުމަށް އެޑިއުކޭޝަން މިނިސްޓްރީން ދަނީ ސްކޫލުތަކާ ގުޅިގެން ގިނަ ޕްރޮގްރާމްތައް ހިންގަމުންނެވެ.
