އުސޫލުތަކާއި ހިލާފުވި ތިން ތަނެއް ބަންދުކޮށްފި
އިންސްޕެކްޝަން ފެށީ ބުދަ ދުވަހު
މާލޭގެ ފިހާރައެއް
ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންތަކާއި ހިލާފަށް ހިންގި އިތުރު ތިން ތަނެއް ބަންދުކޮށްފިއެވެ.
އެޗްޕީއޭ އިން ވަނީ ބުދަ ދުވަހުން ފެށިގެން އެ އެޖެންސީން އާއްމުކޮށްފައިވާ އުސޫލުތަކާއި އެއްގޮތަށް ގްރޭޓަރ މާލެ ސަރަހައްދުގައި ހިމެނޭ ކެއިން ބުއިމުގެ ހިދުމަތްތައް ދޭ ތަންތަނާއި، އާއްމު ކާބޯތަކެތި ވިއްކާ ފިހާރަތަކާއި، ޖިމް ނުވަތަ ފިޓްނަސް ސެންޓަރުތަކާއި، ސެލޫން އަދި މާރުކޭޓް ފަދަ ތަންތަން އަމަލުކުރަމުންދޭތޯ ބެލުމަށްޓަކައި ހާއްސަ އޮޕަރޭޝަނެއް ފަށާފައެވެ.
އެޗްޕީއޭއިން ބުނީ، ހުކުރު ދުވަހު ހިންގި އިންސްޕެކްޝަނު ގައި 35 ތަނެެއް ޗެކްކޮށްފައިވާ ކަމަށެވެ. އޭގެ ތެރެއިން މިންގަނޑުތަކާއި ހިލާފަށް ހިންގަމުން އައި ދެ ފިހާރައަކާއި އެއް ސެލޫނެއް ބަންދުކޮށްފައިވާ ކަމަށް އެޗްޕީއޭއިން ބުންޏެވެ.
އިންސްޕެކްޝަންގެ ތެރެއިން ބުރާސްފަތި ބަންދުކުރީ 50 ތަނެކެވެ. އަދި ބުދަ ދުވަހު 27 ތަނެއް ބަންދުކޮށްފައިވާ ކަމަށް އެޗްޕީއޭއިން ބުންޏެވެ.
