ދީނީ މިނިވަންކަމޭ ބުނެ، މިސްކިތްތަކުގައި އަޅާފައިވާ ފިޔަވަޅުތަކަށް ބޯނުލަނބާ މީހުން އުޅޭ: މިނިސްޓަރ

ދީނީ މިނިވަންކަމޭ ބުނެ، ކޮވިޑް-19 އާ ގުޅިގެން މިސްކިތްތަކުގައި އަޅާފައިވާ ރައްކާތެރިކަމުގެ ފިޔަވަޅުތަކަށް ބޯނުލަނބާ ބައެއް ފަރާތްތައް އުޅެމުންދާކަމަށް އިސްލާމިކް މިނިސްޓަރ ޑރ. އަހުމަދު ޒާހިރު ވިދާޅުވެއްޖެއެވެ.

ބުރާސްފަތި ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ، މިސްކިތްތައް މޮނިޓަރ ކުރުމަށް މިނިސްޓްރީން ސުޕަވައިޒަރުން ހަމަޖެއްސެވި ކަމަށެވެ. އެހެން ނަމަވެސް، މިސްކިތްތަކަށް ވަޑައިގަންނަވާ ބައެއް ބޭފުޅުން ދީނީ މިނިވަންކަމޭ ބުނެ، ފިޔަވަޅުތަކަށް ބޯނުލަނބާ މަންޒަރު ފެންނަމުންދާކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، މިއީ މިހާރުވެސް ފެންނަ ހިތާމަވެރި މަންޒަަރެއް ކަމަށާއި، މިސްކިތްތަކަށް ވަޑައިގަންނަވާއިރު ޚާއްސަ ސަމާލުކަންދޭންޖެހޭ ކަންކަން އެބަހުރި ކަމަށެވެ. އެގޮތުން ގެއިން މުސައްލަ ގެންދިއުމާއި، މާސްކް އެޅުން ފަދަ ކަންކަން މިނިސްޓަރ ފާހަގަ ކުރެއްވިއެވެ.

އޭގެ އިތުރުން، ބައެއް މީހުން މިސްކިތާ ހަމައަށް އަންނައިރު މާސްކް އަޅައިގެން އައި ނަމަވެސް، މިސްކިތަށް އެރުމަށްފަހު މާސްކް ނަގާ ޖީބަށްލާ މަންޒަރުވެސް ފެންނަކަން ފާހަގަ ކުރައްވައި މިނިސްޓަރ ވިދާޅުވީ، އެކަން އެހެން ނުކުރުމަކީ މިނިސްޓްރީގެ ވަރަށް ބޮޑު އިލްތިމާސެއް ކަމަށެވެ. އަދި ނަމާދު ކުރާއިރުވެސް ގެއިން މުސައްލަ ހިފައިގެން އައިސް، ގައިދުރުކަމަށް ސަމާލުކަން ދީގެން ނަމާދުގެ އަޅުކަން އަދާ ކުރެއްވުމަށް މިނިސްޓަރ ވަނީ އިލްތިމާސް ކުރައްވާފައެވެ.

މިނިސްޓަރ ވިދާޅުވީ، މިވަގުތުވެސް އެންމެ ބޮޑު އެއް ކަންބޮޑުވުމަކީ ބައެއް ރައްޔިތުން ކަމާބެހޭ ފަރާތްތަކުގެ އިރުޝާދުތަކަށް ބޯނުލެނބުން ކަމަށެވެ. އެހެން ނަމަވެސް، ކަމާބެހޭ ފަރާތްތަކުގެ އިރުޝާދުތަކަކީ އެމީހެއްގެ އަމިއްލަ ނަފްސާއި، އެހެނިހެން ރައްޔިތުންގެ ސަލާމަތާއި ރައްކާތެރިކަންވެސް އޭގައި އެކުލެވިގެންވާ ކަމެއްކަން ހަނދާން ކުރަންޖެހޭ ކަމަށް މިނިސްޓަރ ވިދާޅުވިއެވެ.