އަންނަ ސީޒަނަށްފަހު އޮޒިލް އާސެނަލް ދޫކޮށްލަނީ

އާސެނަލަށް ކުޅެމުން އަންނަ ޖަރުމަންގެ މިޑްފީލްޑަރު މެސެޓް އޮޒިލް އަންނަ ސީޒަނަށްފަހު އާސެނަލް ދޫކޮށްލާނެ ކަމުގެ 90 އިންސައްތަ ޔަގީންކަން އެބައޮތް ކަމަށް އޭނާގެ އޭޖެންޓް ބުނެފިއެވެ.

މީގެ ކުރިން އޮޒިލްވެސް އާސެނަލް ދޫކޮށްލާނެކަމުގެ އިޝާރާތެއް ދީފައެވެ. އެގޮތުން އޮޒިލް ވަނީ އާސެނާލާއެކު އޭނާއަށް ކުރިމަގު އޮތް ކަމާމެދު ސުވާލު އުފެދޭ ކަމަށް ބުނެފައެވެ.

އާސެނަލްގެ ކުރީގެ ކޯޗު އުނާއި އެމިރީގެ އިރުޝާދުގެ ދަށުން އޮޒިލްއަށް އާސެނަލްގެ ފުރަތަމަ އެގާރައިން ޖާގައެއް ނުލިބެއެވެ. އެކަމަކު އައު ކޯޗު މިކޭލް އާޓެޓާގެ އިރުޝާދުގެ ދަށުން އޮޒިލްއަށް ވަނީ ފުރަތަމަ އެގާރައިން ޖާގަ ދޭން ފަށާފައެވެ.

އޮޒިލްގެ އޭޖެންޓު ބުނީ ކުރިއަށް އޮތް ސީޒަނުގައި އޮޒިލް ފެންނާނީ އާސެނަލުން ކަމަށާއި އޭނާގެ އެއްބަސްވުމުގެ މުއްދަތު އަދި ނުނިމޭ ކަމަށެވެ. އެކަމަކު އަންނަ ސީޒަނަށް ފަހު އޮޒިލް އާސެނަލް ދޫކޮށްލާން ބޭނުންވާ ކަމަށް އޭޖެންޓް ވަނީ ބުނެފައެވެ.

އަނިޔާގެ ސަބަބުން ކޮވިޑް-19ށް ފަހު އިނގިރޭސި ޕްރިމިއާ ލީގުގައި ކުޅުނު އެއްވެސް މެޗަކުން އޮޒިލް ފެނިފައިނުވި ނަމަވެސް، އޭނާ މިހާރު އަންނަނީ އާސެނަލްގެ ފަރިތަކުރުންތަކުގައި ބައިވެރިވަމުންނެވެ.

އާސެނަލްގައި އޮޒިލްގެ ކުރިމަގާމެދު ސުވާލު އުފެދުނު ނަމަވެސް، އޭނާ އަކީ އާސެނަލްގެ އެންމެ ބޮޑު މުސާރައެއް ލިބޭ ކުޅުންތެރިއާއެވެ. އެގޮތުން ހަފުތާއަކު އޮޒިލްއަށް ޖުމްލަ 350،000 ޕައުންޑް ލިބެއެވެ.

ޝާލްކާއިން ސީނިއާ ކެރިއަރު ފެށި އޮޒިލް ވަނީ ރެއާލް މެޑްރިޑާއެކުވެސް ކާމިޔާބު ދުވަސްތަކެއް ހޭދަކޮށްފައެވެ. 2013 ވަނަ އަހަރު ރެއާލް ދޫކޮށް އާސެނަލަށް ބަދަލުވި އޮޒިލް ވަނީ އާސެނަލަށް މިހާތަނަށް ކުޅެދިން 254 މެޗުގައި 44 ލަނޑު ކާމިޔާބުކޮށްފައެވެ. އަދި ވަނީ އާސެނަލާއެކު އެފްއޭ ކަޕް ދެ ފަހަރު ކާމިޔާބުކޮށްފައެވެ.