ބޭރުތެރޭގައި އުޅޭއިރު މިހާރު މާސްކު އެޅުން މަޖުބޫރު
މާލޭގައި ކޮވިޑް-19 ގެ ކޭސްތައް ފާއިތުވި ދެ ހަފްތާ ތެރޭގައި ވަނީ އިތުރުވާން ފަށާފައި
މާލޭ މަގުމަތީގައި މީހަކު މާސްކު އަޅައިގެން ހިނގާފަދަނީ
މާލޭގައި ކޮވިޑް-19 ގެ ކޭސްތައް ފާއިތުވި ދެ ހަފްތާ ތެރޭގައި އިތުރުވަމުންދާތީ އާންމު ތަންތަނުގައި އުޅޭއިރު މާސްކު އެޅުން މިހާރު މަޖުބޫރު ކަމަށް ރައީސް އޮފީހުން ހާމަކޮށްފި އެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ބައިވެރިވެވަޑައިގެންނެވި ނޭޝަނަލް ޓާސްކް ފޯސް މީޓިންގ އަށް ފަހު ރައީސް އޮފީހުން ކޮށްފައިވާ ޓްވީޓެއްގައި ބުނެފައިވަނީ އަލުން ލޮކްޑައުންއަކަށް ދިޔުމަކީ ހުރިހާ ރައްޔިތުން އެންމެ ބޭނުންވާ ގޮތް ނޫންކަމަށެވެ. އެހެންކަމުން ބޭރުތެރޭގައި އުޅޭއިރު މާސްކު އެޅުމަށާއި ތަންތަނަށް ދިޔުން މަދުކުރުމަށް އަދި ބައްދަލުވާ މީހުންގެ އަދަދު މަދުކުރުމަށް ވަނީ ބުނެފަ އެވެ.
ރައީސް އޮފީހުން މިކަން ހާމަކޮށްފައިމިވަނީ ބުދަ ދުވަހުގެ ރޭ ރާއްޖެ ޓީވީން ގެނެސްދިން "ފަލަ ސުރުޚީ" ޕްރޮގްރާމްގައި ހެލްތު މިނިސްޓަރ އަބްދުﷲ އަމީން މާސްކް އެޅުން މަޖުބޫރު ނުކުރެވޭނެ ސަބަބެއް މިވަގުތު ނެތް ކަމަށާއި، މާސްކް އެޅުން މަޖުބޫރު ކުރަން މިހާރު ވެސް ވިސްނަވަމުން ގެންދަވާ ކަމަށް ވިދާޅުވެފައި ވަނިކޮށެވެ. އަދި މަޝްވަރާތައްވެސް ކުރައްވާނެ ކަމަށް މިނިސްޓަރ ވަނީ ޕްރޮގްރާމްގައި ވާހަކަދައްކަވަމުން ވިދާޅުވެފަ އެވެ.
މާސްކު އެޅުން މަޖުބޫރު ކުރުމަށް ސަރުކާރުން ނިންމާފައިމިވަނީ އެކަމަށް އެތައް ބަޔަކު ގޮވާލަމުން ދަނިކޮށެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި ވާހަކަދައްވަމުން ހެލްތު މިނިސްޓަރ އަބްދުﷲ އަމީން ވިދާޅުވެފައިވަނީ މާސްކް އެޅުމަށް މިހާރުވެސް ގައިޑްލައިންތަކެއް އެކަށަ އެޅިފައިވާކަމަށެވެ. މިނިސްޓަރ އިތުރަށް ވިދާޅުވީ، މާސްކް އެޅުން މަޖުބޫރު ކުރަން ނުޖެހޭ ޙާލަތެއް މިވަގުތު އޮތް ކަމަށް އަމިއްލަފުޅަށް ވެސް ޤަބޫލު ނުކުރެއްވޭ ކަމަށެވެ.
ރާއްޖޭގައި މިވަގުތު އެކްޓިވް ކޭސްގެ ގޮތުގައި 983 މީހުން އެބަތިބި އެވެ. މުޅި ޖުމްލަ 3568 މީހުންނަށް ވަނީ ކޮވިޑް-19 އަށް ރާއްޖޭގައި ޕޮޒިޓިވްވެފަ އެވެ. އަދި 16 މީހުން ވަނީ މިހާތަނަށް އައިއިރު ނިޔާވެފަ އެވެ.
