ނައިބް ރައީސްގެ އާދޭސް: ރާއްޖޭގެ ޙާލަތު އިތުރަށް ގޯސްވުމަށް ފުރުސަތު ނުދެއްވާ!
29 ޖުލައި 2020 | ބުދަ 15:18ކޮވިޑް-19 އާ ގުޅިގެން ޖަމާއަތުގައި ނަމާދު ނުކުރެވި ދިޔަ
ނައިބްރައީސް ފައިސަލް ނަސީމް - ނައިބްރައީސް ވަނީ ކޮވިޑާއި ގުޅިގެން އެންމެން އެކުގައި މަސައްކަތް ކުރެއްވުމަށް އެދިވަޑައިގެންފައި
ކޮވިޑް-19 އާ ގުޅިގެން ރާއްޖޭގެ ޙާލަތު އިތުރަށް ގޯސްވުމަށް ފުރުސަތު ނުދިނުމަށް ނައިބްރައީސް ފައިސަލް ނަސީމް އިލްތިމާސް ކުރައްވައިފިއެވެ.
ބުދަ ދުވަހު ނައިބްރައީސް ކުރެއްވި ޓްވީޓެއްގައި ވިދާޅުވީ، ކޮވިޑް-19 އާ ގުޅިގެން ޖަމާއަތުގައި ނަމާދު ނުކުރެވި، ސުކޫލުތައްވެސް ބަންދުކުރަން ޖެހުނު ކަމަށެވެ. އަދި ވިޔަފާރިތައް ހުއްޓި އެންމެން ގޭގައި ބަންދުވުމުގެ ގެއްލުން އެންމެންވެސް ތަޙައްމަލު ކުރަން ޖެހިފައިވާކަމަށް ނައިބް ރައީސް ވިދާޅުވިއެވެ.
ނައިބް ރައީސްގެ ޓްވީޓުގައި އިތުރަށް ވިދާޅުވީ، ރާއްޖޭގެ ޙާލަތު މިއަށްވުރެ ގޯސްވެގެން ދިއުމަށް ފުރުސަތު ނުދިނުމަށް އެދިވަޑައިގަންނަވާ ކަމަށެވެ. އަދި ކޮވިޑް-19 ގެ ވަބާއިން ސަލާމަތްވުމަށް އެންމެން އެކުގައި މަސައްކަތް ކުރަން ޖެހޭކަމަށް ނައިބްރައީސް ވިދާޅުވިއެވެ.
ކޮވިޑް-19 އާ ގުޅިގެން އަޅާފައިވާ ފުރަބަންދުގެ ޙާލަތަށް ލުއިދިނުމުގެ 3 ވަނަ މަރުޙަލާ ފެށުނު ފަހުން، ގިނަ އަދަދެއްގެ ބަޔަކު ދަނީ ޕޮޒިޓިވް ވަމުންނެވެ. އަދި މި ފަހުން ފެންނަމުންދާ ކޭސްތަކުގެ ތެރޭގައި ގިނަ އަދަދެއްގެ ދިވެހިންވެސް ހިމެނެއެވެ.
އަންގާރަ ދުވަހުވެސް އިތުރު 137 މީހަކު ކޮވިޑް-19 އަށް ޕޮޒިޓިވްވެފައިވާއިރު، އޭގެ ތެރެއިންވެސް 92 މީހުންނަކީ ދިވެހިންނެވެ.
