ގިނައިން ހަކުރު އެކުލެވޭ ބާވަތްތަކުގެ ޑިއުޓީ ބޮޑުކުރަނީ
28 ޖުލައި 2020 | އަންގާރަ 05:53ތުއްތު ކުދިންނަށް ކާންދޭ މެޓާ ފަދަ ތަކެތިން ޑިއުޓީ ބޮޑުކުރުމަށް ވަނީ ނިންމާފައި
ރެޖިސްޓަރ އޮފް ކޮމްޕެނީސް މަރިޔަމް ވިސާމް
އާންމު ސިއްޚަތު ރައްކައުތެރިކުރުމުގެ ގޮތުން ގިނައިން ހަކުރު އެކުލެވޭ ބާވަތްތަކުން ޑިއުޓީ އިތުރު ކުރުމަށް ނިންމާފައިވާ ކަމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ރެޖިސްޓަރ އޮފް ކޮމްޕެނީސް މަރިޔަމް ވިސާމް ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން ވިސާމް ވިދާޅުވީ މިނިސްޓްރީ އާ މޯލްޑިވްސް ކަސްޓަމްސް ސާރވިސް ގުޅިގެން ކުރި ދިރާސާ ތަކުން ފާހަގަ ކުރެވިފައިވާ ސިއްޚަތަށް ގެއްލުން ލިބޭ ތަކެތިން ޑިއުޓީ އިތުރު ކުރުމަށް ނިންމާފއިވާ ކަމަށެވެ.
އެގޮތުން ގިނައިން ހަކުރު އެކުލެވޭ ބާވަތްތަކާއި، އެކި ބާވަތްތަކުގެ ތައްޔާރީ މީޓާއި (ސޮސެޖް ފަދަ ތަކެތި) ތުއްތު ކުދިން ކެއުމަށް ބޭނުން ކުރާ މެޓާ ފަދަ ތަކެތިން ޑިއުޓީ އިތުރު ކުރުމަށް ނިންމާފައިވާ ކަމަށެވެ.
ވިސާމް ވިދާޅުވީ އާންމު ސިއްޚަތު ރައްކައުތެރިކުރުމުގެ ޤާނޫނުގެ ދަށުން ހެލްތް ޕްރޮޓެކްޝަން ބޭނުމަށް ފަންޑެއް ޤާއިމްކޮށްފައިވާ ކަމަށާއި އެ ފަންޑު މެދުވެރިކޮށް ސިއްޚަތު ރައްކައުތެރިކުރުމަށް އާންމުން ހޭލުންތެރި ކުރުމަށް ހިންގާނެ އެކި އެކި ޕްރޮގްރާމްތަކަށް ހޭދަކުރެވޭނެ ނިޒާމެއް ޤާއިމް ކުރެވިފައިވާ ކަމަށެވެ.
އެ ނިޒާމްގެ ތެރެއިން ގިނައިން ހަކުރު އެކުލެވޭ ބާވަތްތަކުގެ ތަކެއްޗާއި ދުންފަތް އެކުލެވޭ ބާވަތްތަކުގެ ތަކެތިން ނެގޭ ޑިއުޓީގެ 3 އިންސައްތަ އެ ފަންޑަށް ކޮންޓްރިބިއުޓް ކުރުމަށް ހަމަޖެހިފައިވާ ކަމަށް ވިސާމް ވިދާޅުވިއެވެ.
އެކަމުގެ ސަބަބުން އާންމުން ހޭލުންތެރި ކުރުމުގެ ޕްރޮގްރާމްތައް ކުރިއަށް ގެންދެވޭނެ ކަމަށް ވެސް ވިސާމް ވިދާޅުވިއެވެ.
