ދަނޑުވެރިންނަށް ޚާއްޞަކޮށްގެން އުފައްދާފައިވާ ނަފާ ލޯން ސްކީމު, " ދަނޑުވެރި ނަފާ" ޕްރޮގްރާމްގެ ދަށުން މިހާތަނަށް 7 މިލިއަނަށް ވުރެ ގިނަ ރުފިޔާގެ ލޯނު ދޫކޮށްފައިވާ ކަމަށް ނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ވިދާޅުވެއްޖެއެވެ.

މަޖިލީހުގެ ސަރުކާރު މައްސޫލިއްޔަތު އަދާ ކުރާ މިންވަރު ބަލާ ކޮމިޓީގައި ވާހަކަދައްކަވަމުން ޒަހާ ވިދާޅުވީ މި ލޯން ސްކީމްގެ ދަށުން މިހާތަނަށް ހަތް މިލިއަން ތިން ލައްކަ ރުފިޔާގެ ލޯނު ދޫކޮށްފައިވާ ކަމަށެވެ. މިނިސްޓްރީން އެސްޑީއެފްސީ ބޭންކު މެދުވެރިކޮށް ދޫކުރާ މި ލޯނު މިހާތަނަށް 25 ފަރާތަށް ދޫކޮށްފައިވާނެ ކަމަށެވެ.

18 މާޗް 2019 ވަނަ އަހަރު ފަށާފައިވާ ދަނޑުވެރި ނަފާ ލޯނު ޕްރޮގްރާމްގެ ދަށުން ދޫކޮށްފައިވާ ލޯނުތަކުގެ 30 އިންސައްތަ ދޫކޮށްފައިވަނީ ދަނޑުވެރި އަންހެން ކަނބަލުންނަށް ކަން ފާހަގަކުރައްވާ ޒަހާ ވިދާޅުވީ ދަނޑުވެރިކަން ކުރާ ރަށްރަށުގައި ގާއިމުވެ ތިބެ، ދަނޑުވެރިންނަށް ލިބޭ ފަންނީ އެހީތެރިކަން ކައިރިން ލިބޭނެ މަގު ތަނަވަސް ކޮށްދިނުމަށްޓަކައި ދަނޑުވެރިން ތަމްރީނު ކޮށްފައިވާނެ ކަމަށެވެ.

އެގޮތުން، އާއްމުކޮށް ހުޅުވާލައިގެން ހޮވާލެވުނު ހަ ރަށަކުން، މީހަކު ރާއްޖެއިން ބޭރަށް ފޮނުވައިގެން 6 މަސް ދުވަހުގެ މުއްދަތުގެ ތެރޭގައި ފީލްޑް އޮފިސަރުން ތަމްރީނު ކުރުމުގެ ޕްރޮގްރާމެއްގައި ވެސް ބައިވެރިކޮށްފައިވާނެ ކަމަށެވެ. އަދި މިފަދަ އިތުރު ތަމްރީނުތައް ހިންގުމަށް ބޭނުންވާ ފަންޑު ހޯދުމުގެ މަސައްކަތް މިހާރު ވެސް މިނިސްޓްރީން ކުރަމުން އަންނަ ކަމަށް ވިދާޅުވިއެވެ.

މި ސްކީމްގެ ދަށުން ދަނޑުވެރިކަމާ ގުޅުން ހުރި ތަފާތު އެކިއެކި މަސައްކަތްތައް ކުރުމަށް ލޯނު ދޫކުރާއިރު، ދަނޑުވެރި ނަފާ ލޯނު ސްކީމުން ކޯޕަރޭޓް ނުވަތަ ކުންފުންޏަކަށްނަމަ ދެ މިލިއަން ރުފިޔާ އަދި އަމިއްލަ ފަރުދަކަށް ނަމަ ފަސް ލައްކަ ރުފިޔާ ދޫކުރުމަށް ވަނީ ހަމަޖެހިފައެވެ.

ކޮމިޓީގައި އިތުރަށް ވާހަކަ ދައްކަވަމުން މިނިސްޓަރ ޒަހާ ވިދާޅުވީ ދަނޑުވެރިކަމުން އުފައްދާ ތަކެއްޗަކީ ގުޑް އެގްރިކަލްޗަރ ޕްރެކްޓިސްގެ މިންގަނޑުތަކަށް ފެތޭ ގޮތަށް އުފައްދާ، މާކެޓުކުރަމުން ގެންދާ ތަކެއްޗަށް ހެދުމަށްޓަކައި ދަނޑުވެރިންނަށް އަމާޒުކޮށްގެން މިއަހަރުގެ މިހާތަނަށް 21 ރަށެއްގައި ތަމްރީނު ޕްރޮގްރާމްތައް ހިންގާފައިވާނެ ކަމަށެވެ. އަދި މި ތަމްރީން ޕްރޮގްރާމްތަކުން ޖުމްލަ 1190 ދަނޑުވެރިން ތަމްރީނު ކޮށްފައިވާނެ ކަމަށެވެ.