އއ. ތޮއްޑޫގައި ކުޅިވަރާ ބެހޭ ވުޒާރާގެ ފަރާތުން އެޅި ފުޓްސަލް ދަނޑުގެ މަސައްކަތް ނިންމާލައިފިއެވެ.
ތޮއްޑޫގައި ކުޅިވަރާ ބެހޭ ވުޒާރާގެ ފަރާތުން އެޅި ފުޓްސަލް ދަނޑުގެ މަސައްކަތް ކޮށްފައިވަނީ ނަކާ ޕްރައިވެޓް ލިމިޓެޑުންނެވެ. މި މަސައްކަތަށް ކުޅިވަރާ ބެހޭ ވުޒާރާއިން ވަނީ 1.4 މިލިޔަން ރުފިޔާ ޚަރަދުކޮށްފައެވެ.
ކުޅިވަރާ ބެހޭ ވަޒީރު އަޙްމަދު މަޙްލޫފް ކުރެއްވި ޓްވީޓެއްގައި ވިދާޅުވީ ތޮއްދޫގައި ކަރާ ދަނޑު ގިނަޔަސް ފުޓްސަލް ދަނޑުގެ އިންތިޒާރުގައި ޒުވާނުން ތިބޭތާ ވަރަށް ދުވަސްވެއްޖެ ކަމަށާއި، މަސައްކަތް ލަސްވުމުން މާފަށް އެދޭ ކަމަށެވެ.
ތޮއްޑޫ ފުޓްސަލް ދަނޑުގެ މަސައްކަތް ނިމުނުއިރު، އެ ރަށުގެ އައުޓްޑޯ ވޮލީބޯޅަ ކޯޓުގެ ބޭރުގައި ފެންސު ޖެހުމުގެ މަސައްކަތް ވަނީ ނިންމާލާފައެވެ. ވަޒީރު ވިދާޅުވީ އައުޓްޑޯ ވޮލީބޯޅަ ކޯޓުގެ ބޭރުގައި ފެންސު ޖެހުމުގެ މަސައްކަތް ނިމިފައިވާއިރު، އަންނަ އަހަރުގެ ތެރޭގައި އެ ކޯޓު ރީތި އައުޓްޑޯ ކޯޓަކަށް ބަދަލުވާނެ ކަމަށެވެ. އަދި ވަނީ މި މަސައްކަތްތައް ކުރިއަށް ގެންދިޔުމުގައި ތޮއްޑޫ ދާއިރާގެ މަޖިލިސް މެންބަރު ޙަސަން ޝިޔާން ދެއްވި އެއްބާރުލެއްވުމަށް ޝުކުރު އަދާކުރައްވާފައެވެ.
ތޮއްޑޫ ފުޓްސަލް ދަނޑުގެ މަސައްކަތް ނިންމާލިއިރު، ކުޅިވަރާ ބެހޭ ވުޒާރާގެ ފަރާތުން ރާއްޖޭގެ އެކި ކަންކޮޅުތަކުގައި މިހާރު ކުރިއަށްގެންދާ ގިނަ މަޝްރޫއުތައް ވަނީ ނިމުމަކާ ހަމަޔަށް އައިސްފައެވެ. އެގޮތުން ކުރިއަށް އޮތް ދުވަސްތަކުގައި ވެސް ގިނަ މަޝްރޫއުތަކެއް ނިމިގެންދާނެ ކަމަށް އެ ވުޒާރާއިން މައުލޫމާތުދެއެވެ.
