އައިއެސްއަށް ވާގިވެރިވާ ބޮޑު ނެޓްވޯކްއެއް ރާއްޖޭގައި އޮވޭ: އދ.ގެ ސެކިއުރިޓީ ކައުންސިލް
25 ޖުލައި 2020 | ހޮނިހިރު 18:57އައިއެސްއާ ގުޅުން އޮންނަ މީހުން ރާއްޖޭގައި އޮންނަ ކަމަށް މީގެ ކުރިންވެސް ތުހުމަތުކުރެވޭ
އައިއެސް ޖަމާއަތުގެ ބައެއް
އިސްލާމީ ހަރުކަށި ޖަމާއަތެއް ކަމަށްވާ އިސްލާމިކް ސްޓޭޓް (އައިއެސް) ގެ ފިކުރުތަކަށް ތާއިދުކުރާ ބޮޑު ނެޓްވޯކް އޮންނަ ކަމަށް ޔުނައިޓެޑް ނޭޝަންސް ސެކިއުރިޓީ ކައުންސިލްގެ ރިޕޯޓެއްގައި ބުނެފިއެވެ.
އައިއެސްގެ ނެޓްވޯކެއް ރާއްޖޭގައި އޮންނަ ކަމަށް ބުނާ، އެ ރިޕޯޓަކީ ޓެރަރިސްޓުން ލިސްޓުކުރާ ޔޫއެންސްއެސްސީގެ 1267 ކޮމިޓީގެ ރިޕޯޓްގައެވެ. އެ ކޮމިޓީގެ ރިޕޯޓުގައިވާގޮތުން އައިއެސް އަށް ވާގިވެރިވާ ބަޔަކު ހިމެނޭ ބޮޑު ނެޓްވޯކެއް ރާއްޖޭގައި އޮންނަ ކަމަށްވެއެވެ.
ޔޫއެންއެސްސީގެ މި ރިޕޯޓުގައި މިހެން ބަޔާންކޮށްފައިވާއިރު އދ. މަހިބަދޫ ބަނދަރުގައި އަޅާފައި އޮތް ހަތް އުޅަނދެއްގައި ރޮކޮށްލި ހާދިސާއެއް ހިނގިއެވެ. ޓެރަރިސްޓް ޖަމާއަތްތަކުގެ ހަރަކާތްތަކާއި، ޓެރަރިސްޓް ހަމަލާތަކާ ބެހޭ މައުލޫމާތު ހާމަ ކުރުމާއި، އެފަދަ މައުލޫމާތު ސަރުކާރުތަކަށް ފޯރުކޮށް ދިނުމުގެ މަގްސަދުގައި މަސައްކަތް ކުރާ, ސައިޓް އިންޓެލިޖެންސް ގްރޫޕްގައި ރިޕޯޓުކޮށްފައިވާގޮތުން، މި ހަމަލާގެ ޒިންމާ އައިސިސް އިން ވަނީ ނަގާފަ އެވެ.
ސައިޓް އިންޓެލިޖެންސް ގްރޫޕުން ހާމަކޮށްފައިވާ ގޮތުގައި، މި ހަމަލާ އަކީ އައިސިސް ޖަމާއަތުން ރާއްޖެއަށް ދިން ފުރަތަމަ ޓެރަރިސްޓް ހަމަލާއެވެ.
ހަރުކަށި ފިކުރުގެ މީހުން ހޯދުމަށްޓަކައި ސަރުކާރުން އޮޕަރޭޝަނެއް ކުރިއަށްގެންގޮސްފައިވެއެވެ. އެގޮތުން މި އޮޕަރޭޝަނަކީ، ރަށްރަށުގައި ހަރުކަށި ފިކުރު ފަތުރައި ދައުލަތުގެ އާންމު ނިޒާމާއި އިންތިޒާމުތަކުން ބޭރުން ވަކި ޖަމާއާތް ހަދައިގެން އުޅޭ ބަޔަކު، އަންހެނުންނާއި ކުޑަކުދިންގެ ހައްޤުތަކުން މަހްރޫމުކޮށް އެ ފަރާތްތަކަށް ނާޖާއިޒު ފައިދާނަގައި، އަންހެނުންނާއި ކުޑަކުދިން މުޖުތަމަޢާއި ވަކިކޮށް ވެކްސިން ނުދީ، ތައުލީމު ހާސިލުކުރުމުން މަހްރޫމުކޮށް އަންހެނުންނާއި ކުޑަކުދިންގެ ފުރާނާ އަށް ނުރައްކާތެރި ހާލަތްތަކަށް ހުށައެޅިފައިވާތީ އެކަން ކުރުމުގައި އިސްވެ ހަރަކާތްތެރިވާ ފަރާތްތައް ހޯދަން، ބަލައި ފާސްކުރުމަށް ހިންގި އޮޕަރޭޝަނެކެވެ. މި އޮޕަރޭޝަން ކުރިއަށް ގެންގޮސްފައިވަނީ ރ. މަޑުއްވަރީގަ އެވެ.
