ޕޮމްޕެއޯގެ އިލްތިމާސް އިންޑިއާއަށް: ޗައިނާއަށް ބަރޯސާވާ މިންވަރު ކުޑަކުރޭ

އިންޑިއާއިން ޗައިނާއަށް ބަރޯސާވާ މިންވަރު ކުޑަކުރުމަށް އެމެރިކާއިން ގޮވާލައިފިއެވެ.

"އެމެރިކާ-އިންޑިއާ ބިޒްނަސް ކައުންސިލްސް އައިޑިއާ" ސަމިޓްގައި ވާހަކަ ދައްކަވަމުން އެމެރިކާގެ ސެކްރެޓަރީ އޮފް ސްޓޭޓްސް މައިކް ޕޮމްޕެއޯ ވަނީ މުވާސާލާތީ ހިދުމަތްތަކާއި ބޭސްފަރުވާގެ ކަންކަމަށް ޗައިނާއަށް ބަރޯސާވާ މިންވަރު ކުޑަކުރުމަށް އިލްތިމާސްކޮށްފައެވެ.

އެމެރިކާއާއި ޗައިނާގެ ހާރިޖީ ގުޅުހުން ހީނަރުވެފައިވާ ދަނޑިވަޅެއްގައި ޕޮމްޕެއޯ މިހެން ވިިދާޅުވުމުން، މަޝްރަހު ދިރާސާ ކުރާ މާހިރުން އަންނަނީ މިއީ ދެ ގައުމުގެ ދެމެދުގައި ޖެހިފައިވާ މައްސަލައިގައި ވަކި ކޮޅެއް އިހްތިޔާރުކުރުމަށް އިންޑިއާއަށް ދިން ފުރުސުތަކެއް ކަމަށް ބުނެފައެވެ.

ސަމިޓްގައި ވާހަކަ ދައްކަވަމުން ޕޮމްޕެއޯ ވަނީ އިންޑިއާގެ އަމިއްލަ ކުންފުނިތަކަށް ބަރޯސާވުމަށް އިލްތިމާސްކޮށް، އެ ގައުމަކީ ބައިނަލްއަގްވާމީ އެތައް ގައުމެއްގެ އިތުބާރު ހޯދާފައިވާ ގައުމެއްކަން ފާހަގަކުރައްވާފައެވެ. އިންޑިއާއާއި ޗާއިނާގެ ގުޅުންވެސް ވަނީ، ބޯޑަރ ކްލޭޝްއެއްގައި އިންޑިއާގެ އަސްކަރިއްޔާގެ 20 ސިފައިން މަރާލި ހާދިސާގައި ވަރަށް ބޮޑަށް ހީނަރުވެފައެވެ.

ދުނިޔޭގެ އެންމެ ބޮޑު ދެ އިގްތިސާދު އޮންނަ ދެ ގައުމުގެ ދެމެދުގައި ފެށިފައިވާ އަރާރުންތަކަކީ ދުނިޔޭގައި މިހާރު ހަލުވިކަމާއެކު ފެތުރުމެންދާ ކޮވިޑް-19 އަކީ ޗައިނާގެ ޕްރޮޑަކްޓެއްކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް ތަކުރާރުކޮށް ވިދާޅުވެ ޗައިނާއަށް ބޮޑެތި ފާޑުކިޔުންތަކެއް އަމާޒުކުރާތީ އުފެދިފައިވާ ކަމެއްކަމަށް މާހިރުން ބުނެއެވެ. ހަލަބޮލިކަމުގެ ތެރޭގައި އެމެރިކާއިން ވަނީ ހިއުސްޓަންގައި ހުންނަ ޗައިނާގެ ކޮންސިއުލޭޓް ބަންދުކުރުމަށް އަންގާފައެވެ. މިކަމާއި ގުޅިގެން ޗައިނާއިންވެސް ވަނީ އެ ގައުމުގައި ހުންނަ އެމެރިކާގެ ކޮންސިއުލޭޓް ބަންދުކުރުމަށް އަންގާފައެވެ.