ޗައިނާއިން ޓެޑްރޯސް 'ގަނެފައިވާ' ކަމަށް ބުނެ ފެތުރެމުންދާ ވާހަކަތައް އޭނާ ދޮގު ކުރައްވައިފި

ޗައިނާއިން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)ގެ ޑިރެކްޓަރ ޖެނެރަލް ޓެޑްރޯސް އަދެނޯމް 'ގަނެފައިވާ' ކަމަށް ބުނެ ފެތުރެމުންދާ ވާހަކަތައް އޭނާ ދޮގު ކުރައްވައިފިއެވެ.

ދާދިފަހުން އެމެރިކާގެ ސެކެޓްރީ އޮފް ސްޓޭޓް މައިކް ޕޮމްޕެއޯ ވަނީ އެ ގައުމުގެ ގާނޫނު ހަދާ މަޖިލީހުގެ މެމްބަރުންނާއެކު ބޭއްވި ބައްދަލުވުމެއްގައި، ޗައިނާއިން ޑަބްލިއުއެޗްއޯގެ ޑިރެކްޓަރ ޖެނެރަލް 'ގަނެފައިވާ' ކަމަށް ތުހުމަތު ކުރައްވާފައެވެ. އަންގާރަ ދުވަހު އޮތް ނޫސްވެރިންގެ ބައްދަލުވުމެއްގައި ވެސް ޕޮމްޕެއޯ ވަނީ ޗައިނާއިން ޑަބްލިއުއެޗްއޯއަށް ނުފޫޒު ފޯރުވުމުގެ މަސައްކަތް ކުރަމުންދާ ކަމަށް ވިދާޅުވެފައެވެ.

މި ތުހުމަތުތަކަށް ރައްދުދެއްވައި ޓެޑްރޯސް ވިދާޅުވެފައިވަނީ މި ފަދަ ތުހުމަތުތަކަކީ އެއްވެސް ގޮތަކަށް ބަލައިގަނެވޭނެ ކަމެއް ނޫން ކަމަށާއި، މިފަދަ ތުހުމަތުތައް ކުރުމުގެ ބަދަލުގައި ކޮވިޑް-19 އިން ރައްޔިތުން ރައްކާތެރިކުރުމަށް މަސައްކަތް ކުރުމަށް އިސްކަން ދިނުމަށް ގޮވާލައްވާ ކަމަށެވެ. އަދި އޭނާ ވަނީ މި ތުހުމަތުތައް ދޮގު ކުރައްވާފައެވެ.

ކޮވިޑް-19 އާއި ގުޅިގެން އެ ޖަމިއްޔާއިން ކުރަމުންދާ މަސައްކަތަށް އެންމެ ބޮޑަށް ފާޑު ކިޔަނީ އެމެރިކާއިންނެވެ. އެގޮތުން ޗައިނާއިން ދުނިޔޭގެ ސިއްޙަތު ޖަމިއްޔާއާ ގުޅިގެން ޤައުމުތަކަށް އޮޅުވާލާފައިވާ ކަމަށް އެގައުމުގެ ރައީސް ޑޮނާލްޑް ޓްރަމްޕް ތުހުމަތު ކުރައްވާފައިވާއިރު، އެމަނިކުފާނު ވިދާޅުވެފައިވަނީ އެތައް ބައެއްގެ ފުރާނަ ގޮސް، ދުނިޔޭގެ އެކި ކަންކޮޅުތަކުގައި އިޤްތިސާދީ ގޮތުން ޤައުމުތައް އިނދަ ޖެހުނީ ވެސް އެކަމުގެ ސަބަބުން ކަމަށެވެ.