ޓެންޒާނިއާގެ ކުރީގެ ރައީސް ބެންޖަމިން ކާޕާ އަވަހާރަވެއްޖެ

ޓެންޒާނިއާގެ ކުރީގެ ރައީސް ބެންޖަމިން ކާޕާ އުމުރުފުޅުން 81 އަހަރުފުޅުގައި އަވަހާރަވެއްޖެއެވެ.

އަލްޖަޒީރާގައި ރިޕޯޓް ކޮށްފައިވާ ގޮތުން ކާޕާ އަވަހާރަވެފައިވަނީ އާލާސްކަންފުޅާ އުޅުއްވުމަށްފަހު، ދާރުއްސަލާމުގެ ހަސްފަތާލެއްގައި ފަރުވާ ހޯއްދަވަމުން ގެންދަވަނިކޮށް ހުކުރު ދުވަހުގެ ވަގުތެއްގައެވެ.

އިރުމަތީ އެފްރިކާގެ ޤައުމެއްކަމަށްވާ ޓެންޒާނިއާގެ 3 ވަނަ ރައީސް ކާޕާއަކީ 1995ން ފެށިގެން 2005 ވަނަ އަހަރުގެ ނިޔަލަށް އެ ޤައުމުގެ ވެރިކަން ކުރައްވާފައިވާ ބޭފުޅެކެވެ. އެގޮތުން ކާޕާއަކީ އެ ޤައުމުގެ ސަރަޙައްދީ އަމާންކަން ޤާއިމު ކުރުމުގެ މަސައްކަތުގައި ގިނަ ދުވަސްތަކެއް ހޭދަކުރައްވާފައިވާ ބޭފުޅެއްކަމަށް އަލްޖަޒީރާގައި ރިޕޯޓް ކޮށްފައިވެއެވެ.

ހުކުރު ދުވަހު ޓެންޒާނިއާގެ މިހާރުގެ ރައީސް ޖޯން މެގްފުލީ ނެރުއްވި ބަޔާނެއްގައި ވިދާޅުވީ، ކާޕާއަކީ ޤައުމަށް ގިނަ ޚިދުމަތްތަކެއް ކުރެއްވި ބޭފުޅެއް ކަމަށާއި، ޤައުމުގެ އިޤްތިސާދު ބިނާ ކުރުމުގައިވެސް އިސް ރޯލެއް އަދާ ކުރެއްވި ކަމަށެވެ. އަދި ކާޕާ އަވަހާރަވުމާއި ގުޅިގެން ޓެންޒާނިއާގައި 7 ދުވަސް ވަންދެން ބައިދަނޑިއަށް ދިދަ ތިރިކޮށް، ހިތާމަ ފާޅު ކުރުމަށް މެގްފުލީ ވަނީ ނިންމަވާފައެވެ.

1938 ވަނަ އަހަރު ފަޤީރު އާއިލާއަކަށް އުފަންވެވަޑައިގަތް ކާޕާ ވަނީ ބުރަ މަސައްކަތްޕުޅުން ޔުގެންޑާއިން ޑިގްރީ ހާސިލު ކުރައްވައި، އެއަށްފަހު ނިއުޔޯކުގެ ކޮލަމްބިއާ ޔުނިވަރސިޓީން އިތުރަށް ތައުލީމު ހާސިލު ކުރައްވާފައެވެ. އެއަށްފަހު ޓެންޒާނިއާގެ ފުރަތަމަ ރައީސް ޖޫލިއަސް ނިރޭރޭގެ ޕްރެސް ސެކެޓްރީއެއްގެ މަޤާމު ފުރުއްވުމުގެ ކުރިން ކާޕާ ވަނީ ނޫސްވެރިއެއްގެ ގޮތުގައިވެސް މަސައްކަތް ކުރައްވާފައެވެ.

އޭގެ އިތުރުންވެސް ސަރުކާރުގެ ވަޒީރުންގެ މަޖިލީހުގައިވެސް ގިނަ މަޤާމުތަކެއް ފުރުއްވާފައިވާއިރު، އެމެރިކާއަށް ކަނޑައަޅުއްވާފައި ހުންނަވާ ސަފީރުގެ މަޤާމުވެސް ވަނީ ފުރުއްވާފައެވެ.