ކޮވިޑުގެ ކޭސްތައް ގިނަވެ ސައުތް އެފްރިކާގެ ސްކޫލްތައް އަނެއްކާވެސް ބަންދުކޮށްފި

ސައުތް އެފްރިކާގައި ކޮވިޑް-19 ގެ ކޭސްތައް އިތުރުވަމުންދާތީވެ ހަތަރު ހަފްތާ އަށް ސްކޫލްތައް ބަންދުކުރަން ނިންމާފައިވާ ކަމަށް އެ ގައުމުގެ ރައީސް ސީރަލް ރަމަޕޯސާ ވިދާޅުވެއްޖެ އެވެ.

ސައުތް އެފްރިކާގައި ބަލި ޖެހުނު މީހުންގެ އަދަދު ވަނީ ހަތަރު ލައްކަ އަށް ވުރެ މައްޗަށް އަރާފައެެވެ. އެ ގައުމަކީ މިހާރު ދުނިޔޭގައި ފަސް ވަނަ އަށް އެންމެ ގިނައިން ކޮވިޑްގެ ކޭސްތައް ރިޕޯޓް ކުރެވެމުން އަންނަ ގައުމެވެ.

ބުރާސްފަތި ދުވަހު ގައުމާއި މުހާތަބު ކުރައްވާ ވާހަކަފުޅު ދައްކަވަމުން ރައީސް ރަމަޕޯސާ ވިދާޅުވީ، ކުރިޔަށް އޮތް ހަތަރު ހަފްތާ އަށް ހުރިހާ ސްކޫލްތަކެއް ބަންދުކުުރަން ނިންމާފައިވާ ކަމަށެވެ. ސްކޫލްތައް ބަންދު ކުރަނީ މި މަހުގެ 27ން އޮގަސްޓު މަހުގެ 24ށް އެވެ.

ސްކޫލްތައް ބަންދުކުރަން ނިންމާފައިވައިމިވަނީ، ޓީޗަރުންގެ އިތުރުން ބައެއް ޖަމިއްޔާތަކުން އެކަމަށް ގޮވާލުމުންނެވެ.