"ހިޓް-އެންޑް-ރަން" ކޭސްއެއްގައި ފުލުހަކު މަރާލިކަމުގެ ތުހުމަތުގައި މަޝްހޫރު އެނަރޖީ ޑްރިންކެއް ކަމަށްވާ ރެޑްބުލް އުފައްދާ ކުންފުނީގެ ވާރިސަކަށް ކުރެވުނު ދައުވާތައް އަނބުރާ ގެންގޮސްފިއެވެ.

2012 ވަނަ އަހަރު ތައިލެންޑުގެ ވެރިރަށް ބެންކޮކްގައި ހިނގި މި ހިޓް އެންޑް ރަންގައި ފުލުހެއް މަރާލުމުގެ ތުހުމަތު ކުރެވެނީ ވޮރެޔުތް ޔޫވިދަޔާގެ މައްޗަށެވެ. އޭނާއަކީ ރެޑްބުލްގެ ކޯފައުންޑަރ ކެލިއޯ ޔޫވިދަޔާއަށް ކާފަކިޔާ ކުއްޖެކެވެ. އެގޮތުން ކެލިއޯ ނިޔާވިއިރު އޭނާއަކީ ތައިލެންޑްގެ 3 ވަނައަށް އެންމެ މުއްސަނދި މީހާކަމަށް ފޯރބްސް މެގެޒިންގައިވެސް ރިޕޯޓް ކޮށްފައިވެއެވެ.

ކެލިއޯގެ ކާފަދަރިފުޅުގެ މައްޗަށް ކުރެވޭ ދައުވާތައް އަނބުރާ ގެންގޮސްފައިވާކަމަށް ފުލުހުން ބުނި ނަމަވެސް، ދައުވާތައް އަނބުރާ ގެންދިޔަ ސަބަބެއް ސާފު ނުވާކަމަށް ބީބީސީގައި ރިޕޯޓް ކޮށްފައިވެއެވެ. އެގޮތުން އޭނާގެ މައްޗަށް ކުރެވޭ ތުހުމަތު ތަކުގެ ތެރޭގައި ފަރުވާކުޑަކޮށް އެއްގަމު އުޅަނދު ދުއްވުން ހިމެނެއެވެ.

ހާދިސާ ހިނގާ ދިޔަ ގޮތަށް ބަލާއިރު، ވޮރެޔުތް ޔޫވިދަޔާ އޭނާގެ ފެރާރީގައި ދުއްވަމުންދަނިކޮށް، ޕޮލިސް ސާރޖަންޓް މޭޖަރ ވިޗިއަން ކްލަންޕްރަސާތް ދުއްވަމުން ދިޔަ މޮޓޯބައިކްގައި އޭނާގެ ކާރުން ޖެހި، ފުލުސް މީހާގެ ހަށިގަނޑު އެ ސަރަޙައްދާ 100 މީޓަރު ދުރަށް ވިއްސައިގެން ދިޔަކަމަށް ބީބީސީގައި ރިޕޯޓް ކޮށްފައިވެއެވެ. އެހެން ނަމަވެސް މަޑުނުކޮށް ވޮރެޔުތް ވަނީ ފެރާރީ ދުއްވައި އެ ސަރަޙައްދުން ވަގުތުން ގޮސްފައެވެ.

އޭގެ އިތުރުން، އިންވެސްޓިގޭޓިންގ އޮފިސަރުންނަށް އެ ސަރަޙައްދާ ކިލޯމީޓަރެއް ދުރުގައި ހުރި ވޮރެޔުތުގެ ގެއިން އޭނާގެ ފެރާރީ ފެނިފައިވާއިރު، އެކްސިޑެންޓެއް ވެފައިވާ ކަމުގެ ނިޝާންތައްވެސް އޭރު ފެންނަން ހުރިކަމަށް ރިޕޯޓްތައް ބުނެއެވެ. އަދި އޭރު ތުހުމަތު ކުރެވުނީ އެއާއިލާގެ ޑްރައިވަރުގެ މައްޗަށް ނަމަވެސް، ކާރު ދުއްވީ ސީދާ ވޮރެޔުތުކަން ތަހުޤީޤަށް އެނގިފައިވާކަމަށްވެސް ފުލުހުން އޭރު ބުނެފައިވެއެވެ.

މި މައްސަލައިގައި އޭނާ ހައްޔަރު ކުރުމުގެ އަމުރެއްވެސް ފުލުހުންނަށް ނެރެވުނީ ހާދިސާ ހިނގިތާ 5 އަހަރު ފަހުންނެވެ. އެހެން ނަމަވެސް އަނެއްކާވެސް ފުލުހުން ދައުވާތައް އަނބުރާ ގެންދިއުމާއެކު، އެތައް ބައެއްގެ ފާޑުކިއުން ދަނީ އަމާޒުވަމުންނެވެ.