ކޮރަޕްޝަންގެ ތުހުމަތުގައި ޕެރޫގެ ރައީސް މަގާމުން ދުރުކުރުމުގެ މަސައްކަތް ފަށައިފި

ކޮރަޕްޝަންގެ ބޮޑު މައްސަލައެއްގެ ތުހުމަތާއި ގުޅިގެން ޕެރޫގެ ރައީސް ޕެޑްރޯ ޕަބްލޯ ކުޒިންސްކީ މަގާމުން ދުރުކުރުމުގެ މަސައްކަތް އެގައުމުގެ ކޮންގްރެސް އިން ފަށައިފި އެވެ.

ޕެރޫގެ ކޮންގްރެސްގެ މެމްބަރުން ވަނީ، ރައީސް ކުޒިންސްކީ މަގާމުން ވަކި ކުރުމުގެ މަސައްކަތް ފެށުމަށް ބޭނުންވާ ގަރާރު ފާސްކޮށްފައެވެ.

ހުކުރު ދުވަހު ބޭއްވި ގާނޫނު ހަދާ މަޖިލީހުގެ ޖަލްސާގައި، ކުޒިންސްކީ އެމަގާމުން ވަކި ކުރުމުގެ މައްސަލައިގެ ބަހުސް ޑިސެމްބަރު މަހުގެ 21 ވަނަ ދުވަހު ބޭއްވުމަށް ހުށަހެޅި ހުށަހެޅުން ފާސްވީ 93 ވޯޓާއިއެކުގައެވެ. އެހުށަހެޅުމާއި ދެކޮޅަށް ވޯޓު ދެއްވާފައިވަނީ 17 މެމްބަރުންނެވެ.

ޕެރޫގެ ގާނޫނު އަސާސީ ބުނާ ގޮތުން، ރައީސަކު މަގާމުން ވަކި ކުރުމަށް ގާނޫނު ހަދާ މަޖިލީހުގެ މެމްބަރުންގެ ތިން ބައިކުޅަ ދެބައިގެ އަޣުލަބިއްޔަތު ބޭނުންވެއެވެ. އެހެންކަމުން ކުޒިންސްކީ އެމަގާމުން ވަކި ކުރުމަށް ނަގާ ވޯޓުގައި 130 މެމްބަރުންގެ މައްޗަށް އެކުލެވޭ ގާނޫނު ހަދާ މަޖިލީހުގެ 87 މެމްބަރުންގެ ވޯޓު ހޯދަން ޖެހެއެވެ.

ކުޒިންސްކީ މަގާމުން ވަކި ކުރުމަށް ގާނޫނު ހަދާ މަޖިލީހުގައި ވޯޓު ނެގުމުގެ ކުރިން، މިމައްސަލާގައި ގާނޫނު ހަދާ މަޖިލީހަށް ޖަވާބުދާރީވުމަށް ބާއްވާ ޖަލްސާ އަށް އޭނާ ހާޒިރުވާން ޖެހެއެވެ.

ކުޒިންސްކީގެ މައްޗަށް ކުރެވިފައިވަނީ، ބްރެޒިލްގައި ކޮންސްޓްރަކްޝަންގެ ވިޔަފާރި ކުރާ ކުންފުންޏެއް ކަމަށްވާ އޮޑެބްރޭޗް އާއިއެކު ގާނޫނާއި ޚިލާފަށް، ސިއްރުން ފައިސާގެ މުއާމަލާތްތަކެއް ހިންގުމުގެ ތުހުމަތެވެ.

މިމައްސަލަ ފަޅާއަރާފައިވަނީ، 12 ގައުމަކުން އިމާރާތް ކުރުމުގެ ސިނާއަތާއި ގުޅުންހުރި ކޮންޓްރެކްޓްތައް ހޯދުމަށް ރިޝްވަތުގެ ގޮތުގައި 788 މިލިއަން އެމެރިކާ ޑޮލަރަށްވުރެ ބޮޑު އަދަދެއް ޚަރަދުކޮށްފައިވާ ކަމަށް އޮޑެބްރޭޗް އިން އެއްބަސްވުމާއި ގުޅިގެންނެވެ. ޕެރޫގެ އިތުރުން އެކުންފުނިން ރިޝްވަތު ދީފައިވާ ލެޓިން އެމެރިކާގެ ގައުމުތަކުގެ ތެރޭގައި އާޖެންޓީނާ، މެކްސިކޯ އަދި ވެނެޒުއޭލާ ހިމެނެއެވެ.

މިމައްސަލައާއި ގުޅިގެން ކުޒިންސްކީ ވަކި ކުރުމަށް ޕެރޫގެ ގާނޫނު ހަދާ މަޖިލީހުގައި ހިމެނޭ ޕާޓީތައް ގުޅިގެން ހުށަހެޅި ހުށަހެޅުމުގައި ވަނީ، އޮޑެބްރޭޗް އާދެމެދު އޮތް ގުޅުމާއި ބެހޭ ގޮތުން ޕެރޫގެ ރައްޔިތުންނަށް ކުޒިންސްކީ އިތުރުފުޅު ހައްދަވާފައިވާ ކަމަށެވެ. އަދި ޕެރޫގެ ރައީސްގެ މަގާމުގައި ހުންނެވުމުގެ ގާނޫނީ ހައިސިއްޔަތު ކުޒިންސްކީ އަށް ގެއްލިވަޑައިގެންފައިވާ ކަމަށް އެހުށަހެޅުމުގައިވެއެވެ.

ކުޒިންސްކީ ވަނީ ގާނޫނާއި ޚިލާފަށް ފައިސާ ހޯއްދަވާފައިވާ ނުވާނެ ކަމަށް ވިދާޅުވެ، އިސްތިއުފާ ދެއްވުމަށް ދެކޮޅު ހައްދަވާފައެވެ. އެހެންނަމަވެސް، އޮޑެބްރޭޗް ކުންފުންޏަށް ޚިދުމަތެއްގެ ގޮތުގައި ލަފާ ދީފައިވާނޭ ކަމަށް އޭނާ އެއްބަސްވެވަޑައިގެންނެވި އެވެ.

ޓީވީ މެދުވެރިކޮށް ބުރާސްފަތި ދުވަހު ދިން ޚިތާބެއްގައި ކުޒިންސްކި ވަނީ، އޭނާ ނުފިއްލަވާނެ ކަމަށާއި، ފިއްލަވަން ޖެހޭ އެއްވެސް ސަބަބެއް ނެތް ކަމަށް ވިދާޅުވެފައެވެ.

ކުޒިންސްކީގެ މައްޗަށް ކޮރަޕްޝަންގެ ތުހުމަތު ފެންމަތިވެފައިވަނީ، ކުޒިންސްކީގެ ކުންފުންޏެއް ކަމަށްވާ ވެސްޓްފީލްޑް ކެޕިޓަލް ލިމިޓެޑަށް އޮޑެބްރޭޗް އިން 782 މިލިއަން އެމެރިކާ ޑޮލަރު ލިބިފައިވާކަން ޕެރޫގެ ނޫހެއް ކަމަށްވާ އެލް ކޮމާސިއޯ އިން ފަޅާއަރުވާލުމާއި ގުޅިގެންނެވެ.

ވޯލްޑް ބޭންކްގެ ކުރީގެ އޮފިޝަލެއް ކަމަށްވާ ކުޒިންސްކީ ވަނީ، އޭނާގެ ކުންފުނި ވެސްޓްފީލްޑް ކެޕިޓަލް ލިމިޓެޑް ހިންގުމުގައި އޭނާގެ ދައުރެއް ނެތް ކަމަށް ވިދާޅުވެ، އޭނާގެ މާލީ ބަޔާންތައް ހުށަހެޅުމަށް ވައުދުވެވަޑައިގެންފައެވެ.

އޮޑެބްރޭޗް އާ ގުޅުން ހުރި ކޮރަޕްޝަންގެ މައްސަލާގައި އެކުންފުނީގެ ކުރީގެ ރައީސް މާސެލޯ އޮޑެބްރޭޗް މިހާރު ދަނީ، ބްރެޒިލްގައި 19 އަހަރުގެ ޖަލު ހުކުމެއް ތަންފީޒު ކުރަމުންނެވެ.

ކުޒިންސްކީ އަކީ އޮޑެބްރޭޗް އާއި ގުޅުން ހުރި ކޮރަޕްޝަންގެ މައްސަލާގައި ބައިވެރިވެފައިވާކަން ފަޅާއެރި ލެޓިން އެމެރިކާގެ ދެވަނަ ލީޑަރެވެ. އޮޑެބްރޭޗް އިން ރިޝްވަތުގެ ގޮތުގައި 13.5 މިލިއަން އެމެރިކާ ޑޮލަރު ނެންގެވިކަން ސާބިތުވުމާއި ގުޅިގެން އީކުއޭޑޯގެ ނައިބު ރައީސް ޖޯޖް ގްލަސް ހަ އަހަރަށް ޖަލަށްލުމަށް މިދިޔަ ބުދަ ދުވަހު ވަނީ ހުކުމްކޮށްފައެވެ.