ދެހާސް އެގާރަވަނަ އަހަރު ހިންގެވި ކޮރަޕްޝަންގެ އަމަލުތަކެއްގެ ތުހުމަތުގައި އިންޑޮނީޝިއާގެ ޤާނޫނު ހަދާ މަޖިލީހުގެ ރައީސް ސެޓްޔާ ނޮވަންޓޯ ހައްޔަރުކޮށްފިއެވެ. ނޮވަންޓޯ ހައްޔަރު ކޮށްފައިވަނީ އިންޑޮނީޝިއާގެ ކޮރަޕްޝަނާއި ދެކޮޅަށް މަސައްކަތް ކުރާ އިދާރާ، ކޮރަޕްޝަން އިރަޑިކޭޝަން ކޮމިޝަނުންނެވެ. އޭނާއާއި ސުވާލު ކުރުމަށް މިދިޔަ ހަފްތާގައި ވެސް މަސައްކަތްތަކެއް ކޮށްފައިވެއެވެ. އެހެން ނަމަވެސް ނޮވާޓޯގެ ގެކޮޅަށް އެންޓިކޮރަޕްޝަން އޮފިޝަލުން ރެއިޑް ކުރި ވަގުތު އޭނާ ގެޔަކު ނޫޅުއްވައެވެ. އަދި ފަހުން އޮފިޝަލުންނަށް ނޮވާޓޯ ފެނުނީ ހޮސްޕިޓަލުގައި އެޑްމިޓްކޮށްފައި އޮއްވައެވެ. މައުލޫމާތު ލިބިފައިވާ ގޮތުގައި ނޮވާޓޯ އެޑްމިޓް ކުރެވުނީ ކާރު އެކްސިޑެންޓަކާއި ގުޅިގެންނެވެ. އެހެން ނަމަވެސް ފާޑުކިޔާ ފަރާތްތަކުން ތުހުމަތުކުރާ ގޮތުގައި ހޮސްޕިޓަލުގައި އެޑްމިޓްވީ އޮފިޝަލުންގެ ސުވާލުތަކަށް ޖަވާބު ނުދެއްވައި، ފިއްލަވަން ވެގެންނެވެ. އެހެން ނަމަވެސް އާދިއްތަ ދުވަހުގެ ރޭގެ ދަންވަރުގެ ވަގުތެއްގައި ހޮސްޕިޓަލުން ދޫކޮށްލުމާއިއެކު، އޭނާ ވަނީ ހައްޔަރު ކޮށްފައެވެ. އަދި ބަންދުގައި ބަހައްޓައިގެން ތަހުޤީޤް ކުރަމުގެ ބާރު ކޮރަޕްޝަން އިރަޑިކޭޝަން ކޮމިޝަނަށް ލިބިފައިވާއިރު، އަންނަ ޑިސެމްބަރު މަހުގެ 6ވަނަ ދުވަހުގެ ނިޔަލަށް ބަންދުކޮށްފައި ބެހެއްޓުމުގެ ހުއްދަ ކޮމިޝަނަށް ލިބިގެންވެއެވެ.

ނޮވަންޓޯއަކީ އިންޑޮނީޝީއާގެ ވެރިކަންކުރާ ކޯލިޝަންގައި ހިމެނޭ ގޮލްކާރް ޕާޓީގެ ލީޑަރެވެ. ކުރިން އިދިކޮޅުގައި އޮތް އެޕާޓީގެ ވެރިކަމާއި ނޮވަންޓޯ ހަވާލުވެވަޑައިގަތުމަށް ފަހު ރައީސް ޖޮކޯ ވިޑޯޑޯއަށް ތާޢީދު ކުރެއްވުމަށް ނިންމެވިއެވެ. އަދި 2019 ވަނަ އަހަރު ވިޑޯޑޯ ދެވަނަ ދައުރަކަށް ކުރިމަތިލައްވާނަމަ އެމަނިކުފާނަށް ތާޢީދު ކުރާނެކަމަށް ނޮވަންޓޯވަނީ ވިދާޅުވެފައެވެ.

ރައީސް ވިޑޯޑޯއަށް ނޮވަންޓޯ ތާޢީދު ކުރެއްވި ނަމަވެސް، ރައީސް ވިޑޯޑޯގެ މަދަދެއް މިމައްސަލައިގައި ނޮވަންޓޯއަށް ލިބިވަޑައިގަންނަވާނެ ކަމަށް ނުބެލެވެއެވެ. އަދި މިމައްސަލައިގައި ޤާނޫނީ ނިޒާމަށް ފުރިހަމަޔަށް ތަބާވުމަށް ވިޑޯޑޯވަނީ ނޮވަންޓޯއަށް ގޮވާލައްވާފައެވެ.

އާދިއްތަ ދުވަހުގޭ ދަންވަރު ނޮވަންޓޯ ހޮސްޕިޓަލުން ދޫކޮށްލުމުން ހައްޔަރުކުރިއިރު، މިއީ ފާއިތުވި ހަފްތާތަކުގެ ތެރޭގައި އޭނާ ހޮސްޕިޓަލުގައި އެޑްމިޓްކުރި ދެވަނަ ފަހަރެވެ. އެގޮތުން ސެޕްޓެމްބަރު މަހާއި އޮކްޓޯބަރު މަހާއި ދެމެދުވެސް އެޑްމިޓްކުރެވުނު އިރު، އެއީ ނޮވަންޓޯގެ މައްޗަށް މިމައްސަލައިގައި ތުހުމަތުކުރެވުނު ފުރަތަމަ ފަހަރެވެ. ނޮވަންޓޯގެ މައްޗަށް ތުހުމަތުކުރެވެނީ 2011ވަނަ އަހަރު އިންޑޮނީޝިއާގައި އިލެކްޓްރޯނިކް އައިޑެންޓިޓީ ކާޑު ތަޢާރަފްކުރެވުނު އިރު، އެމަސައްކަތް ބަޔަކާއި ހަވާލުކުރުމުގައި ކޮރަޕްޝަން ހިންގަވާފައިވާކަމަށް ތުހުމަތުކުރެވިގެންނެވެ. އިންޑޮނީޝިއާގެ އޮފިޝަލުން ވިދާޅުވާ ގޮތުގައި މިމައްސަލައިގައި 170 މިލިއަން އެމެރިކާ ޑޮލަރުގެ ގެއްލުން އިންޑޮނީޝިއާ ސަރުކާރަށް ލިބިފައިވާކަމަށް ބެލެވެއެވެ.