އެމްޑީޕީއަށް ލިބޭ ފައިސާގެ 50 އިންސައްތަ ދާއިރާތަކަށް ބެހުމަށް ނިންމައިފި
އިސްލާހާއި އެކު ރިޕޯޓު ފާސްވެގެންދިޔައީ 52 މެމްބަރުންގެ ވޯޓާއިއެކު
ބުރާސްފަތި ދުވަހުގެ ރޭ ބޭއްވި އެމްޑީޕީ ގައުމީ މަޖިލީހުގެ ޖަލްސާގެ ތެރެއިން
ދައުލަތުގެ ބަޖެޓުން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ލިބޭ ފައިސާގެ 50 އިންސައްތަ، ދާއިރާތަކަށް ބެހުމަށް އެ ޕާޓީގެ ގައުމީ މަޖިލީހުން ނިންމައިފިއެވެ.
ބުރާސްފަތި ދުވަހުގެ ރޭ ބޭއްވި އެމްޑީޕީ ގައުމީ މަޖިލީހުގެ ޖަލްސާގައި ވަނީ އެމްޑީޕީއަށް ދައުލަތުން ދޭ ފައިސާގެ މިންވަރެއް ދާއިރާތަކަށް ދިނުމާއި ގުޅޭގޮތުން އައްޑޫ ސިޓީ ދާއިރާގެ ރައީސް އަހުމަދު އަދުހަމް ހުށައަޅާފައިވާ ގަރާރު ދިރާސާކޮށް، ގައުމީ މަޖިލީހުގެ ފަސް މެމްބަރުންގެ ކޮމިޓީއާއި ޕާޓީގެ މާލިއްޔަތާއި ޗަންދާ ކޮމިޓީން ގުޅިގެން އެކުލަވާލި ރިޕޯޓު ހުށައަޅާފައެވެ.
މި ރިޕޯޓުގާއި ވަނީ ދައުލަތުން ޕާޓީއަށް ލިބޭ ފައިސާގެ ތެރެއިން ދާއިރާތަކަށް ބަހާ މިންވަރާއި އެ ދާއިރާތަކުން ފައިސާ ހަރަދުކުރަމުން ގެންދާނެ ގޮތްތައް ކަނޑައަޅާފައެވެ. އެގޮތުން ކޮމިޓީން ނިންމާފައިވަނީ ދައުލަތުން ޕާޓީއަށް ލިބޭ ފައިސާގެ 50 އިންސައްތަ ދާއިރާތަކަށް، އަދި އަނެއް 50 އިންސައްތަ ޕާޓީގެ މައި އޮފީސް ހިންގުމަށް ބޭނުންކުރުމަށް ނިންމާފައެވެ.
ކޮމިޓީން ވަނީ ދާއިރާއަށް ލިބޭ 50 އިންސައްތަ އެ ދާއިރާތަކުގެ ރަށްތަކަށް ބެހުމުގައި އަމަލުކުރާނެ އުސޫލެއްވެސް ކަނޑައަޅާފައެވެ.
ކޮމެޓީން ވަނީ ދައުލަތުގެ ބަޖެޓުން ޕާޓީއަށް ލިބޭ ފައިސާ ދާއިރާތަކަށް ދޫކުރުމުގައި މިހާރު އެކައުންޓު ހުޅުވާފައިހުރި ދާއިރާތަކަށް ލިބޭ ފައިސާ އެ އެކައުންޓުތަކަށް ޖަމާކޮށް އަދި އެކައުންޓު ހުޅުވިފައިނުވާ ދާއިރާތަކުގެ ފައިސާ އެ ފަރާތްތަކަށް ކަނޑައެޅިފައިވާ މިންވަރު ހާމަކޮށް، ދާއިރާތަކަށް އަންގާ، ޕާޓީގެ ބެލުމުގެ ދަށުގައި އެކައުންޓު ހުޅުވެންދެން ބެހެއްޓުމަށް ނިންމާފައެވެ.
އެހެންނަމަވެސް ރިޕޯޓުގެ މި ނުކުތާއަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު އިސްލާހެއް ހުށައެޅުއްވިއެވެ. މެމްބަރު ހުށައެޅުއްވި އިސްލާހުގައި ވަނީ އެކައުންޓު ހުޅުވިފައިނުވާ ދާއިރާތަކުގެ ފައިސާ އެ ފަރާތްތަކަށް ކަނޑައެޅިފައިވާ މިންވަރު ހާމަކޮށް، ދާއިރާތަކަށް އަންގާ، ޕާޓީގެ ބެލުމުގެ ދަށުގައި އެކައުންޓު ހުޅުވެންދެން ބެހެއްޓުމުގެ ބަދަލުގައި ކޮންމެ ދާއިރާއެއްގެ ނަމުގައި ބެންކް އޮފް މޯލްޑިވްސްގައި ބޭންކު އެކައުންޓެއް ހުޅުވައި ދައުލަތުގެ ބަޖެޓުން ޕާޓީއަށް ލިބޭ ފައިސާގެ ތެރެއިން ދާއިރާއަށް ދޫކުރާ ފައިސާ އެ އެކައުންޓަށް ޖަމާކުރުމަށެވެ. އަދި އެ އެކައުންޓު ހުޅުވުމަށް ޕާޓީގެ އޮފީހުން އެހީތެރިކަން ފޯރުކޮށްދިނުމަށެވެ.
މި އިސްލާހާއިއެކު ރިޕޯޓު ފާސްވެގެންދިޔައީ ހާޒިރުވެވަޑައިގެން ތިއްބެވި 54 މެމްބަރުންގެ ތެރެއިން 52 މެމްބަރުންގެ ވޯޓާއިއެކުއެވެ.
