ރިޔާސީ ކޮމިޝަނުން ތައްޔާރުކުރި ރިޕޯޓް ލިބިއްޖެ، ކުރަން ޖެހޭ ކަންކަން ކުރަން ފަށައިފިން: ރައީސް
23 ޖުލައި 2020 | ބުރާސްފަތި 09:57ރިޕޯޓާ ގުޅިގެން ކުރަންޖެހޭ ކަންކަން ކުރަން ފައްޓަވާފައިވާ ކަމަށް ވިދާޅުވި
ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙް
ކޮރަޕްޝަނާއި ވައްކަމުގެ ބޮޑެތި މައްސަލަތައް ބެލުމަށް ޤާއިމުކުރި ކޮރަޕްޝަން އެންޑް އެސެޓް ރިކަވަރީ ކޮމިޝަނުގެ ރިޕޯޓު، ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙަށް ހުށަހަޅައިފިއެވެ.
މިކަން އިއުލާން ކުރައްވާ ކުރެއްވި ޓްވީޓެއްގައި ރައީސް ވިދާޅުވީ ކޮމިޝަނުގެ ރިޕޯޓު ލިބިވަޑައިގަތުމާއެކު، ރިޕޯޓާ ގުޅިގެން ކުރަންޖެހޭ ކަންކަން ކުރަން ފައްޓަވާފައިވާ ކަމަށެވެ.
ރައީސް ސޯލިހު "ދަ ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ" އުފެއްދެވީ 4 ޑިސެމްބަރު 2018 ގައެވެ. މި ކޮމިޝަން އުފެއްދެވީ ދައުލަތުގެ މުދަލާއި ފައިސާ ނަހަމަ ގޮތުގައި ބޭނުން ކުރުމުގެ ގިނަ މައްސަލަތައް އެކިއެކި ސަބަބުތައް މެދުވެރި ވެގެން، އެކަށީގެންވާ މިންވަރަށް ތަހުގީގު ކުރެވި އިންސާފު ޤާއިމު ކުރެވިފައި ނުވާތީ، އެ މައްސަލަތައް ތަހުގީގު ކުރުމަށެވެ.
އެސެޓް ރިކަވަރީ ކޮމިޝަނުން ބަލަމުން ދަނީ 1 ޖަނަވަރީ 2012 އިން ފެށިގެން 17 ނޮވެންބަރު 2018 ގެ ނިޔަލަށް ހިނގާފައިވާ ކަމަށް ބެލެވޭ ހިޔާނާތުގެ މައްސަލަތަކެވެ. އެ ކޮމިޝަނުން ބަލަމުންދާ މުހިއްމު މައްސަލަތަކުގެ ތެރޭގައި އެމްއެމްޕީއާރްސީ ޙިޔާނާތުގެ މައްސަލައާއި، ޑޮލަރު ގަތުމުގެ ނަމުގައި އެސްއޯއީތައް މެދުވެރިކޮށް ހިންގާފައިވާ ޙިޔާނާތުގެ މައްސަލައާއި ރާއްޖެއަށް ބިދޭސީން ގެނައުމުގައި އިމިގްރޭޝަނުގެ އިސްވެރިން ހިންގާފައިވާ ކަމަށް ބުނާ ޙިޔާނާތުގެ މައްސަލަތައް ހިމެނެއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އެސެޓް ރިކަވަރީ ކޮމިޝަނުގެ ފަރާތުން ވަނީ އެ ކޮމިޝަނުން ބަލަމުންގެންދާ މައްސަލަތަކުގެ އެންމެ ފަހުގެ މައުލޫމާތު ހިއްސާކޮށްފައެވެ. އެގޮތުން އެމްއެމްޕީއާރްސީ ޙިޔާނާތުގައި ހިމެނޭ ފަސް މީހެއްގެ މައްޗަށް ދައުވާކުރުމަށް ފޮނުވާފައިވާ ކަމަށް ވަނީ ހާމަކޮށްފައެވެ.
