އަމަލާއި ބަހުން މަޙްލޫފް ސާބިތުކޮށްދެއްވަނީ ކުޅިވަރަކީ ކުޅިވަރެއް ނޫންކަން!

ކާމިޔާބީއާ ހަމައަށް ވާސިލްވުމަށް ކުޅިވަރަށް އިންވެސްޓްކުރުމަކީ ކޮންމެހެން ކުރަންޖެހޭ ކަމެއް ކަމަށް ގަބޫލުނުކުރާ އެއްވެސް ވަޒީރެއް، ސަރުކާރެއް، ރާއްޖެއަށް ނާދެއެވެ. ސަބަބަކީ، ކޭމްޕު ދަތުރުތަކާއި އަދި އެ ނޫންވެސް އެހެން ދަތުރުތަކުގައި ކުޅިވަރަށް ގައުމުތަކުން ކޮށްފައި އަދި ކުރަމުންދާ އިންވެސްޓްމެންޓްތައް ފެންނާން ހުރުމެވެ. ކުޅިވަރަކީ ސަމާސާއެއް ނޫނެވެ.

މިއަދުގެ ދުނިޔޭގައި އެއީ ފޫހިފިލުވަން ކުރާ ކަމެއްވެސް ނޫނެވެ. ކުޅިވަރަކީ މުޅި ދުނިޔޭގައިވެސް އެންމެ ބޮޑަށް އިންވެސްޓް ކުރެވިގެން ކުރާ ވަރަށް ސީރިއަސް މަސައްކަތަކަށް ވަނީ ވެފައެވެ. ދިވެހި އެތުލީޓުންނާއި ކޯޗުންގެ އެންމެ ބޮޑު ކަންބޮޑުވުމަކަށް ޒަމާންތަކެއް ވަންދެން ވެފައިވަނީ ޒަމާނީ ފެސިލިޓީތައް ގާއިމުކުރެވިފައި ނެތުމެވެ. އިހު އޮތް ގޮތަށް ކަންކަން އޮތުމެވެ. ބަދަލު ގެންނަން މިކަމާއިގެން އުޅޭނެ މީހަކު އަދި ސަރުކާރެއްވެސް ލިބިފައިނެތުމެވެ.

ރައީސް އިބްރާހިމް މުޙައްމަދު ޞާލިޙުގެ ސަރުކާރުގެ މެނިފެސްޓޯގައި ދިވެހި ކުޅިވަރަށް އިންވެސްޓްކުރުން ހިމެނި، ތަންފީޒުވެގެންދާ މަންޒަރު މިދަނީ ފެންނަމުންނެވެ. މި ރާއްޖޭގެ ވެރިކަމަށް މިހާތަނަށް އައި ސަރުކާރުތަކުގެ ތެރެއިން ކުޅިވަރުގެ އެންމެ ބޮޑު، އަދި ވަރުގަދަ މެނިފެސްޓޯއެއް ހިމެނިގެންވަނީ ރައީސް ޞާލިޙުގެ ސަރުކާރުގައެވެ. ހާއްސަކޮށް ގައުމީ ޓީމުތަކަށް ކުރިއެރުމަށް ހުރި މުހިންމު ކަންތައްތަކެއް ހާސިލްވެގެންދާކަމީ ކުޅިވަރުގެ އާއިލާ ރައީސް ޞާލިޙުގެ ސަރުކާރާ މެދު ރުހި ގަބޫލުވެފައިވާ ސަބަބެވެ.

ގައުމީ ޓީމުތަކަށް ދެމުންއައި އެލަވަންސް އެއްވަރުކުރުމާއި، އަންހެން ފިރިހެން ގިންތިކޮށް ދެމުންއައި އެލަވަންސް އެއްވަރުކުރުމާއި، އިނާމު ފައިސާއަށް ގެނައި ބަދަލަކީ މިއަދު ދިވެހި އެތުލީޓުން ކާމިޔާބަށް ވާސިލްވުމަށް އިތުރު ހިތްވަރެއްލާ އެއް ސަބަބޭ ދެންނެވުން ގޯހަކަށް ނުވާނެއެވެ. ވަކި ކުޅިވަރުތަކަށް ބިންތައް ކަނޑައަޅައި، ޒަމާނީ ފެންވަރަށް އެ ބިންތަކުގައި ކުޅިވަރުގެ އުމްރާނީ ވަސީލަތްތައް ގާއިމުކުރުމުގެ ކުރެހުންތައް ވަޒީރު އަޙްމަދު މަޙްލޫފް އެ ގެންދަވަނީ އެސޯސިއޭޝަންތަކާއެކު ކުރައްސަވަމުންނެވެ. ރައީސް ޞާލިޙުގެ އިރުޝާދުފުޅާއެކު، ވަޒީރާއި ވަޒީރުގެ ޓީމުން ސާބިތުކޮށް ދެއްވަމުން ގެންދަވަނީ ކުޅިވަރަށް އިންވެސްޓް ކުރުމުގެ މުހިންމުކަން އަދުގެ ސަރުކާރަށް ވިސްނޭކަމެވެ. އަދި އެނގޭކަމެވެ.

ކުޑަކުޑަ މިސާލަކަށް ބަލާލާނަމެވެ. އައިސް ބާތަކީ ބުރަ ޓްރެއިނިންއަކަށް ފަހު ލިބިފައި ހުންނަ ކުދި އަނިޔާތަކުގެ ރިކަވަރީއަށް އެންމެ ރަނގަޅުއެއް ފަރުވާ ކަމަށް ގިނަ މާހިރުން ދެކިވަޑައިގަންނަވައެވެ. މިއަދާ ހަމައަށް، ރައީސް ޞާލިޙުގެ ސަރުކާރުން އައިސް ބާތު ރިކަވަރީ ފެސިލިޓީއެއް ގާއިމުކުރުމާ ހަމައަށް ދިވެހި އެތުލީޓުން އައިސް ބާތު ނަގަމުން އައީ ކަންނެލި ފޮއްޓާއި، ކުޑަކުދިންގެ އިންފްލޭޓަބަލް ޕޫލް ފަދަ ތަކެތީގެ ތެރެއަށް އައިސް އަޅައިގެންނެވެ. އެކަމަކު އެ ދުވަސް މާޒީއަށް އެ ދިޔައީއެވެ. ރަނގަޅު ފެންވަރުގެ ޒަމާނީ ފެސިލިޓީއެއް މާފަންނު ޒުވާނުންގެ މަރުކަޒުގައި ގާއިމުކޮށް އެ ނިމުނީއެވެ.

ރައީސް ޞާލިޙުގެ ސަރުކާރުގެ އަމާޒަކަށް ވެފައިވަނީ ހަމައެކަނި ކުޅިވަރު ކުޅުވުމެއް ނޫނެވެ. ކުޅިވަރަކީ ކުޅިވަރެއް ކަމަށް ނުދެކެއެވެ. ވަޒީރު އަޙްމަދު މަޙްލޫފް އެ ގެންދަވަނީ އެކަން އަމަލާއި ބަހުން ސާބިތުކޮށް ދެއްވަމުންނެވެ. އެތުލީޓުންނާއި ކޯޗުންނާއި އެސޯސިއޭޝަންތަކާއި އަދި ބެލެނެވެރިންނާއި ވެސް އެހާ ގާތުންނެވެ. ކުޅިވަރުގެ އާއިލާގެ ފުރިހަމަ އިތުބާރު ވަޒީރަށް ލިބެނީ މިހެންވެއެވެ. ކުޅިވަރާއިގެން އުޅޭތީއެވެ. ކުޅިވަރު ސީރިއަސްކޮށް ނަގާތީކަން ޔަގީނެވެ.