އޭއެފްސީ ކަޕްގެ މެޗުތައް ރާއްޖޭގައި ބާއްވަން ސަރުކާރުން ޚަރަދެއް ނުކުރާނެ: މަޙްލޫފް

އޭއެފްސީ ކަޕްގެ ދެކުނު އޭޝިއާގެ ޓީމުތަކުގެ ގްރޫޕްގެ މެޗުތައް ރާއްޖޭގައި ބޭއްވުމަށް ސަރުކާރުން އެއްވެސް ޚަރަދެއް ނުކުރާނެ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

އޭއެފްސީ ކަޕްގެ މެޗުތައް ރާއްޖޭގައި ބޭއްވުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ން ކުރި ބިޑް ކާމިޔާބުކޮށް، މެޗުތައް ރާއްޖޭގައި ކުޅުމުގެ ފުރުސަތު ވަނީ ހޯދާފައެވެ.

ރައްޔިތުންގެ މަޖިލީހުގައި އަންގާރަ ދުވަހުގެ ޖަލްސާގައި މެދު ހެންވޭރު ދާއިރާގެ މެންބަރ އަލީ އާޒިމް ކުރެއްވި ސުވާލަކަށް ޖަވާބު ދެއްވަމުން ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވީ އޭއެފްސީ ކަޕްގެ މެޗުތަކަށް ރާއްޖޭން އެއްވެސް ޚަރަދެއް ކުރަން ނުޖެހޭނެ ކަމަށާއި، އޭގައި ހުރިހާ ޚަރަދެއް ކުރާނީ އޭއެފްސީންނާއި އެފްއޭއެމުން ކަމަށެވެ. އެހެންކަމުން ކުޅިވަރާ ބެހޭ ވުޒާރާގެ ބަޖެޓުން އެއްވެސް ޚަރަދެއް ކުރަން ނުޖެހޭނެ ކަމަށްވެސް ވަޒީރު ވިދާޅުވިއެވެ.

އާންމު ގޮތެއްގައި އޭއެފްސީ ކަޕްގައި ވާދަކުރާ ރާއްޖޭގެ ކްލަބްތަކުގެ ޚަރަދުތައް ބަލަހައްޓަނީ ކުޅިވަރާ ބެހޭ ވުޒާރާއިންނެވެ. އެގެތުން ރާއްޖޭން ބޭރުގައި ކުޅޭ މެޗުތަކަށް ޓީމުތަކަށް ޓިކެޓް ނެގުމުގެ ކަންތައްތައް ކޮށްދެނީވެސް އެ ވުޒާރާއިންނެވެ.

ވަޒީރު ވިދާޅުވީ އޭއެފްސީ ކަޕް ރާއްޖޭގައި ބޭއްވުމުގެ ފުރުސަތު ލިބުމުން އޭގެ ފައިދާ ކްލަބުތަކުގެ އިތުރުން ރާއްޖޭގެ ފަތުރުވެރިކަމަށްވެސް ކުރާނެ ކަމަށެވެ. އަދި އޭއެފްސީ ކަޕްގެ ގްރޫޕް ސްޓޭޖުގައި ރާއްޖޭގެ ދެ ޓީމެއް ވާދަކުރާތީއާއެކު، ރާއްޖޭގައި މެޗުތައް ބޭއްވުމަށް އެއްބާރުލުން ދިނީ މުބާރާތުގެ ގްރޫޕް ސްޓޭޖް ފަހަނައަޅައި، ރާއްޖޭގެ ޓީމެއް ރަނގަޅު ހިސާބަކަށް ދިޔުމަށް މަގުފަހިވެގެންދާނެތީ ކަމަށްވެސް ވިދާޅުވިއެވެ.

ރާއްޖޭގައި އޭއެފްސީ ކަޕްގެ ދެކުނު އޭޝިއާގެ ޓީމުތަކުގެ ގްރޫޕްގެ މެޗުތައް ބޭއްވުމުގެ ފުރުސަތު ލިބުނުއިރު، މި ގްރޫޕްގައި މިފަހަރު ރާއްޖޭގެ ދެ ޓީމެއް ވާދަކުރެއެވެ. އެއީ މާޒިޔާ ސްޕޯޓްސް އެންޑް ރެކްރިއޭޝަނުގެ އިތުރުން ޓީސީ ސްޕޯޓްސް ކްލަބެވެ. ދެން މި ގްރޫޕްގައި ހިމެނެނީ ބަންގްލަދޭޝްގެ ބަޝުންދުރާ ކިންގްސް އާއި އިންޑިއާގެ ޗެންނާއީ ސިޓީ އެފްސީއެވެ.

އޭއެފްސީ ކަޕްގެ ގްރޫޕް ސްޓޭޖު މެޗުތައް އޮކްޓޯބަރު މަހު 23ން ނޮވެމްބަރު ހަތަރަކާ ދެމެދު ކުޅޭ ގޮތަށް ނިންމާފައިވާއިރު، 13 ދުވަހު ތެރޭގައި ގްރޫޕް ސްޓޭޖުގެ ހުރިހާ މެޗެއް ކުޅެ ނިމޭނެއެވެ. ގްރޫޕް ސްޓޭޖު ފަހު ދެ މެޗު އެއް ވަގުތެއްގައި ކުޅޭ ގޮތަށް އޮތުމާއެކު، ގައުމީ ފުޓްބޯޅަ ދަނޑުގެ އިތުރުން އައްޑޫ ސިޓީ ފުޓްބޯޅަ ދަނޑުވެސް ބޭނުންކުރަން ޖެހޭނެއެވެ.

ކޮވިޑް-19 އާ ގުޅިގެން އޭއެފްސީ ކަޕްގެ މެޗުތައް މެދުކަނޑާލިއިރު، މީގެ ކުރިން ގްރޫޕް ސްޓޭޖުގެ ފުރަތަމަ މެޗުގައި މާޒިޔާ އާއި ޓީސީ ވަނީ މާޗު މަހު 12 ވަނަ ދުވަހު ވާދަކޮށްފައެވެ. އެ ދުވަހު ޓީސީ ނުކުތީ ބަންގްލަދޭޝްގައި އެ ގައުމުގެ ބަޝުންދުރާ ކިންގްސްއާ ދެކޮޅަށެވެ. އަދި އިންޑިއާގައި މާޒިޔާ ވަނީ އެ ގައުމުގެ ޗެންނާއީ ސިޓީ އެފްސީއާ ދެކޮޅަށް ކުޅެފައެވެ.