2023 ވަނަ އަހަރު ރާއްޖޭގައި ބޭއްވުމަށް ހަމަޖެހިފައިވާ އިންޑިއަން އޯޝަން އައިލޭންޑް ގޭމްސް (އައިއޯއައިޖީ) 2024 ވަނަ އަހަރަށް ލަސްކުރަން ޖެހިދާނެ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަދައްކަވަމުން މަޙްލޫފް ވިދާޅުވީ ކޮވިޑް-19 އާ ގުޅިގެން 2020 ވަނަ އަހަރު ކުރަން ނިންމި ވަރަށް ގިނަ މަސައްކަތްތައް ހުއްޓުމަކަށް އައިސްފައިވާ ކަމަށާއި، އެގޮތުން އައިއޯއައިޖީއަށް ތައްޔާރުވުމަށް ކުރަން ހުރި މަސައްކަތްތައްވެސް ހުއްޓުމަކަށް އައިސްފައިވާ ކަމަށެވެ. ކޮވިޑް-19 އާއެކު ވަރަށް ބައިވަރު ސުވާލުތަކެއް އުފެދިފައިވާ ކަމަށާއި، އެގޮތުން 2023 ވަނަ އަހަރު އައިއޯއައިޖީ ބޭއްވިދާނެ ކަމާ މެދު ސުވާލު އުފެދިފައިވާ ކަމަށްވެސް މަޙްލޫފް ވިދާޅުވިއެވެ.

މަޙްލޫފް ވިދާޅުވީ 2023 ވަނަ އަހަރު ގޭމްސް ބާއްވަން ކުރިން ރޭވިފައިވީ ނަމަވެސް، ކޮވިޑް-19 އާ ގުޅިގެން ހުރިހާ ކަމެއްވެސް އެއް އަހަރު ފަހަށް ދާތަން ފެންނަމުންދާ ކަމަށާއި، 2020 ވަނަ އަހަރަކީ ނާންނަ އަހަރެއް ފަދަ ކަމަށެވެ. އެހެންކަމުން އައިއޯއައިޖީ 2024 ވަނަ އަހަރަށް ނުވަތަ 2025 ވަނަ އަހަރަށް ލަސްކުރުމަށް ވިސްނަމުންދާ ކަމަށްވެސް ވިދާޅުވިއެވެ. ނޫންނަމަ 2023 ވަނަ އަހަރުގެ ގޭމްސް އެހެން ގައުމަކަށް ދިނުމަށްފަހު، ދެން އޮންނަ ގޭމްސްއެއް ރާއްޖެއިން ހޯސްޓު ކުރުމާ މެދު ވިސްނަމުން އަންނަ ކަމަށް ވެސް މަޙްލޫފް ވިދާޅުވިއެވެ. އެކަމަކު މިކަންކަމަށް ގޮތެއް ނިންމާނީ ކުޅިވަރު އެސޯސިއޭޝަންތަކާއި، އައިއޯއައިޖީ ބޭއްވުމަށް ރައީސުލްޖުމްހޫރިއްޔާ އެކުލަވާލި ކޮމިޓީން ކަމަށްވެސް މަޙްލޫފް ވިދާޅުވިއެވެ.

މަޙްލޫފް މީގެ ކުރިން ވަނީ އައިއޯއައިޖީއަށް ކުރަންޖެހޭ މަސައްކަތް މިހާރު ދެ ގުނަވެފައިވާއިރު، ރާއްޖޭގައި ގޭމްސް ބާއްވާނަމަ އެކަން ކުރަންޖެހޭނީ 2023 ވަނަ އަހަރުގެ މާޗު ނޫނީ އެޕްރީލް މަހު ކަމަށާއި، ގައުމުގެ އިގުތިޞާދާއި މިހާރު މިއޮތް ވަގުތައް ބަލާއިރު، އެ ފުރުސަތު ވަރަށް ބޮޑަށް ހަނިވެފައިވާ ކަމަށްވެސް ވިދާޅުވެފައެވެ.