ޤާނޫނު އެނގިހުރެ މެންބަރު އާޒިމް ކަންތައް ކުރައްވަނީ ވަރަށް ހަޑިކޮށް: މަޙްލޫފް

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބު ހުއްޓުވުމަކީ ޤާނޫނީ ގޮތުން ކުރެވޭނެ ކަމެއް ނޫން ކަމަށާއި، އެކަން ރައްޔިތުންގެ މަޖިލީހުގެ މެންބަރުންނަށް ވަރަށް ރަނގަޅަށް އެނގޭނެ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

ރައްޔިތުންގެ މަޖިލީހަށް އަންގާރަ ދުވަހު ކުޅިވަރާ ބެހޭ ވަޒިރު ހާޒިރުކުރިއިރު، މެންބަރުން ވަޒީރާ ސުވާލު ކުރުމުގެ ފުރުސަތު ގަޑިއެއްހާއިރަށް ދެމިގެންދިޔައެވެ. މެންބަރުންގެ ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ ވަކި ގޮތެއް ނިމެންދެން އެފްއޭއެމްގެ އިންތިޚާބު ފަސްކުރުމަށް އެދޭ ކަމަށް މަޖިލީހުގެ އިޖުތިމާޢީ ކޮމިޓީން ސިޓީއެއް ލިބުނު ކަމަށާއި، އެގޮތުން އެމަނިކުފާން އިޖުތިމާޢީ ކޮމިޓީން އެދުނު ގޮތަށް އެފްއޭއެމްގެ އިންތިޚާބު ފަސްކުރުމަށް އެދުނު ކަމަށެވެ.

އެފްއޭއެމްގެ އިންތިޚާބާ ގުޅިގެން އަމާޒު ކުރެވުނު ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ އެމްޑީޕީގެ ޕާލިމެންޓްރީ ގްރޫޕްގެ ލީޑަރު އަލީ އާޒިމަކީ ޤާނޫނީ ގޮތުން އެސޯސިއޭޝަންގެ ކަންކަން ރޭވިފައިވާ ގޮތް އެންމެ ރަނގަޅަށް އެނގޭ ފަރާތް ކަމަށާއި، އެހެންނަމަވެސް ޤާނޫނާއި ޚިލާފަށް ވަޒީރު ލައްވާ އެކަންކަން ކުރުމަކީ ހިތާމަކުރައްވާ ކަމެއް ކަމަށެވެ. އަދި މިއަދު އާޒިމް ކުރައްވަން އުޅުއްވާ ކަންކަން ސިފަ ކުރެވެނީ އެމްޑީޕީގެ ޕްރައިމަރީގައި ރައީސް މުޙައްމަދު ނަޝީދަށް ވޯޓުލާން އުޅުމުން، ފުލުހުން ނިކުމެ އެކަން ހުއްޓުވި ގޮތް ކަމަށް ވަޒީރު ވިދާޅުވިއެވެ.

ކުޅިވަރާ ބެހޭ ވަޒީރަކަށް އެއްވެސް ޤައުމީ ކުޅިވަރު އެސޯސިއޭޝަނެއްގެ އިންތިޚާބު ހުއްޓުވާ އިންތިޚާބަށް ބާރުފޯރުވޭނެ އެއްވެސް ހައިސިއްޔަތެއް ނެތް ކަމަށެވެ. އަދި އެކަން ކުރުމަށް ޤާނޫނުން ފުރުސަތު އޮތީ ސްޕޯޓްސް ކޮމިޝަނަރަށް ކަމަށް ހާމަކުރައްވަމުން ވަޒީރު ވިދާޅުވީ އެފްއޭއެމްގެ އިންތިޚާބު ނުހުއްޓުވީ ޤާނޫނާ ޚީލާފަށް އެކަން ނުކުރަން ވެގެން ކަމަށެވެ.

މީގެ ހަތަރު މަސް ކުރިން އެފްއޭއެމްގެ އިންތިޚާބަށް ކުރިމަތިލާން ހުޅުވާލުމުން އެއްވެސް މީހަކު ކުރިމަތިނުލާ، އޭގެ ހަތަރު މަސް ފަހުން ވަޒީރަކަށް ހުންނަ މީހެއްގެ ކައިރީ ބުނެގެން ފުލުހުން ފޮނުވައިގެން ގައުމީ ކުޅިވަރު އެސޯސިއޭޝަނެއްގެ އިންތިޚާބު ހުއްޓުވުމަކީ ހަޑިކަމެއް ކަމަށްވެސް ވަޒީރު ވިދާޅުވިއެވެ.

އެފްއޭމާ ދެކޮޅަށް ބައެއް ކްލަބުތަކުން މީގެ ކުރިން ކުރި ހަނގުރާމައިގެ ތެރެއަށް ވެންނެވި ކަމަށާއި، އޭގެ ފަހުން ވޮލީބޯޅައިގެ ތެރެއަށް ވަދެ އެކަންކުރި ނަމަވެސް، މިއަދާ ހަމައަށް އައިއިރުވެސް ވޮލީބޯޅަވެސް އޮތީ ވާނުވާ ނެނގި ކަމަށްވާއިރު، މިހާތަނަށް ކުރެވުނު ތަޖުރިބާ އަކީ ގައުމީ ކުޅިވަރު އެސޯސިއޭޝަންތަކުގެ ތެރެއަށް ވަދެ، ހަލޮބޮލި ކުރުމުން ނުކުންނަ ނަތީގާ ގޯސްވުން ކަމަށް ވަޒީރު ވިދާޅުވިއެވެ.

ރައްޔިތުންގެ މަޖިލީހަށް އަންގާރަ ދުވަހު ކުޅިވަރާ ބެހޭ ވަޒިރު ހާޒިރުކުރިއިރު، މެންބަރުން ކުރެއްވި ސުވާލުތަކަށް ވަޒީރު ވަނީ ޖަވާބުދެއްވާ، ކުޅިވަރުގެ ދާއިރާގެ ހުރި ގިނަ ކަންބޮޑުވުންތަކެއް ސާފުކޮށްދެއްވާފައެވެ.