ރާއްޖޭގައި ދިިރިއުޅެމުންދާ ބިދޭސީން ފޮނުވާލުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، އަނބުރާ ގައުމަށް ދާން ބޭނުންވާ ބިދޭސީން ހޯދަން އިކޮނޮމިކް މިނިސްޓްރީން މާލޭ މަގުމަތީގައި ހަރަކާތްތެރިވާން ފަށައިފިއެވެ.

އިކޮނޮމިކް މިނިސްޓްރީގެ މީޑިއާ އޮފިޝަލް ވިދާޅުވީ، ރަށަށް ދާން ބޭނުންވާ ބިދޭސީންގެ މައުލޫމާތު އެއްކުރަން ބުދަ ދުވަހުން ފެށިގެން މިނިސްޓްރީގެ މުވައްޒަފުން ޒިކުރާ މިސްކިތް ސަރަހައްދުގައި ޗެކް ޕޮއިންޓެއް ބަހައްޓައިގެން ހަރަކާތްތެރިވަމުންދާ ކަމަށެވެ. އިކޮނޮމިކް މިނިސްޓްރީން ކުރިޔަށް ގެންދާ ޕްރޮގްރާމައި ގުޅޭ މައުލޫމާތު ހޯދަން ކުރި މަސައްކަތް ވަނީ ނާކާމިޔާބު ވެފައެވެ. މީޑިއާ އޮފިޝަލު އޮފިޝަލް ވިދާޅުވީ، އެކަމާއި ގުޅޭ އިތުރު މައުލޫމާތު ލިބޭނީ މެއިލް ކުރުމުން ކަމަށެވެ.

ގައުމަށް އަނބުރާ ދާން ބޭނުންވާ ބިދޭސީން ފޮނުވާލުމުގެ މަސައްކަތް ފަށާފައިވާއިރު، ލޮކްޑައުން ތެރޭގައި ވެސް ގިނަ އަދަދެއްގެ ބިދޭސީން ވަނީ އަނބުރާ ގައުމަށް ގެންގޮސްފައެވެ.

ބިދޭސީންގެ މައްސަލާގައި ދާދި ފަހުން ރައްޔިތުންގެ މަޖިލީހުގައި ވާހަކަ ދައްކަވަމުން އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވީ، މި އަހަރު ތެރޭގައި 20,000 އެއްހާ ބިދޭސީން ގައުމަށް ފޮނުވާލަން ހަމަޖެހިފައިވާ ކަމަށެވެ. މިނިސްޓަރ ވިދާޅުވީ ބިދޭސީންގެ ނުރުހުމުގައި އެމީހުންގެ ގައުމަށް ފޮނުވާލުމަށް ގަސްތު ނުކުރައްވާ ކަމަށެވެ. އެ ފުރުސަތު އޮތް ނަމަވެސް، ރާއްޖެއިން މިހާތަނަށް ވެސް ބިދޭސީންނާ ދޭތެރޭ ކަންތައްތައް ކޮށްފައިވާގޮތުން މި ކަމުގައި ދިވެއްސެއްގެ ހައިސިއްޔަތުން އެ މީހުންގެ ނުރުހުމުގައި އެކަން ކުރުމަށް ބޭނުންވެނުލައްވާ ކަމަށް ފައްޔާޒު ވިދާޅުވިއެވެ.

ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންގެ ކޮމިޓީގައި ވާހަކަ ދައްކަވަމުން ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވީ، ރާއްޖޭގައި އުޅޭ ބިދޭސީންގެ މައްސަލަ ސިފަކުރައްވަނީ ބޭރުގެ އިސްތިއުމާރީ ބާރަކުން ގައުމެއް ހިފާފައި އޮންނައިރު ފެންނަ ފަދަ މަންޒަރު ގޮތަށް ކަމަށެވެ.