ޢާންމުންގެ ތެރެއިން ޖޭއެސްސީއަށް އުއްމުކުލްސުމް އައްޔަނުކުރަން ފާސްކޮށްފި
އުއްމުކުލްސުމް އައްޔަން ކުރުމަށް ފާސްކޮށްފައިވަނީ 67 މެމްބަރުންގެ އިއްތިފާގުން
ޖޭއެސްސީ
ޖުޑީޝަލް ސަރވިސް ކޮމިޝަނަށް އާންމުންގެ ތެރެއިން އައްޔަންކުރާ މެންބަރެއްގެ ގޮތުގައި އުއްމުކުލްސުލް ކަނޑައެޅުމަށް ރައްޔިތުންގެ މަޖިލީހުން ފާސްކޮށްފިއެވެ.
އުއްމު ކުލްސުމް އެ މަގާމަށް އައްޔަނުކުރަން ފެނޭތޯ ނެގި ވޯޓުގައި އެ މަޤާމަށް އުއްމުކުލްސުމް އައްޔަން ކުރުމަށް ފާސްކޮށްފައިވަނީ 67 މެމްބަރުންގެ އިއްތިފާގުންނެވެ. އާންމުގެ ތެރެއިން ޖޭއެސްސީއަށް ކަނޑައަޅާ މެމްބަރެއްގެ ގޮތުގައި އައްޔަނު ކުރި އުންމުކުލްސުމް މަސައްކަތް ކުރައްވަމުން ގެންދަވަނީ ހެރިޓޭޖް މިނިސްޓްރީގައެވެ.
އުއްމު ކުލްސުމްގެ ނަން ފާސްވުމާއި ގުޅިގެން ކޮމިޓީ ރިޕޯޓްގައި ދެން ފާހަގަކޮށްފައިވާ ނަމަށް ވޯޓަކަށް ނާހައެވެ.
ޖޭއެސްސީގައި 10 މެމްބަރުން ތިއްބަވާއިރު އާންމުންގެ ތެރެއިން މެމްބަރަކު އައްޔަނުކުރުމަށް ފާސްކުރުމާއި ގުޅިގެން މިހާރު ހުސްކޮށް އޮތީ ސިވިލް ސަރވިސް ކޮމިޝަންގެ ރައީސްގެ މަގާމުގައި ހުންނަވާ ބޭފުޅާގެ މަގާމު އެކަންޏެވެ. އެއީ އެ މަގާމުގައި ހުންނެވި ޑރ އަލީ ޝަމީމް އިސްތިއުފާދެއްވުމާއި ގުޅިގެންނެވެ.
