ޔުއެފާއިން މެންޗެސްޓާ ސިޓީއަށް ދިން އަދަބު ދަމަހައްޓަން މަސައްކަތްކުރި ކްލަބުތަކުގެ ތެރޭގައި އާސެނަލް ހިމެނޭ ކަމަށް ތުހުމަތު ކުރެވިފައިވަނިކޮށް، އާސެނަލަށް ދަނޑު ބޭރުން އިހުތިރާމް ނުކުރާ ކަމަށް ސިޓީގެ ކޯޗު ޕެޕް ގާޑިއޯލާ ބުނެފިއެވެ.
ފެބްރުއަރީ މަހު ޔުއެފާއިން ސިޓީ ސަސްޕެންޑް ކުރީ ފައިނޭންޝިއަލް ފެއާ ޕްލޭ (އެފްއެފްޕީ) ގަވާއިދާ ޚިލާފުވީ ކަމަށް ބުނެއެވެ. އެކަމަކު ސިޓީން ވަނީ މި މައްސަލަ ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) ގައި އިސްތިއުނާފު ކޮށްފައެވެ. އަދި ސީއޭއެސްއިން ވަނީ އިސްތިއުނާފުގެ މައްސަލަ ސިޓީއާ އެއްކޮޅަށް ނިންމާ ޔުއެފާއިން ދިން އަދަބު އުވާލާފައެވެ.
ގާޑިއޯލާ ބުނީ ދަނޑު މަތީގައި ސިޓީއާ ދެކޮޅަށް ކުޅޭ ކޮންމެ ޓީމަކަށްވެސް އޭނާގެ އިހުތިރާމް އޮންނާނެ ކަމަށާއި، އެގޮތުގެ މަތިން އާސެނަލަށްވެސް އެ އިހުތިރާމް ކުރާ ކަމަށެވެ. އެކަމަކު ދަނޑު ބޭރުން އާސެނަލަށް އެއްވެސް އިހުތިރާމެއް ނޯންނާނެ ކަމަށް ގާޑިއޯލާ ބުންޏެވެ.
ގާޑިއޯލާ މީގެ ކުރިން ބުނެފައިވަނީ ސިޓީއާ ދެކޮޅަށް ވާހަކަ ދެއްކި މީހުން މާފަށް އެދެން ޖެހޭނެ ކަމަށާއި، އިސްތިއުނާފުގެ މައްސަލަ ސިޓީއާ އެއްކޮޅަށް ނިމުމުން، އެއިން އެނގިގެންދަނީ ސިޓީގެ ކުށެއް ނެތްކަން ކަމަށެވެ. އަދި ސިޓީން ގޯސްކޮށް ކަމެއް ކޮށްފައިވާނަމަ، އެކަމުގެ އަދަބު އެ ކްލަބަށްވެސް ލިބެންޖެހޭނެ ކަމަށްވެސް ގާޑިއޯލާ ބުންޏެވެ.
ސިޓީގެ ސަސްޕެންޝަން އުވާލުމާ ގުޅިގެން ޓޮޓެންހަމްގެ ކޯޗު ހޯސޭ މޮރީނިއޯ އާއި ލިވަޕޫލްގެ ކޯޗު ޔާގެން ކްލޮޕް ވަނީ އެކަމާ ދެކޮޅަށް ވާހަކަ ދައްކާފައެވެ. އެ ދެ ކޯޗުން ބުނީ އެފްއެފްޕީ ގަވާއިދުގައިވާ ކަންތައްތަކާ އެއްގޮތަށް ކަންތައްތައް ހިނގާތޯ ބަލަން ޔުއެފާއިން ކުރާ މަސައްކަތް ބަލިކަށިކޮށް އޮތުމަކީ ބަލައިގަނެވޭނެ ކަމެއް ނޫން ކަމަށާއި، ގަވާއިދެއް ހެދިފައިވާނަަމަ އޭގެ ބާރެއް ނެތި ބޭނުން ބަޔަކަށް ވަކި އުސޫލުތަކެއްގެ ތެރެއިން ސަލާމަތްވެވޭނަމަ އެ ގަވާއިދެއްގެ ބޭނުމެއް ނެތް ކަމަށެވެ.
