ސިފައިންގެ ކޯޕަރޭޓިވް (ސިފްކޯ) އަދި ޕޮލިސް ކޯޕަރޭޓިވް ސޮސައިޓީ (ޕޮލްކޯ) މެދުވެރިވެގެން ސިފައިންނާއި ފުލުހުންނާއި ޚާއްސަކޮށްގެން ސިފައިންނާއި ފުލުހުންގެ އާއިލާތަކަށް ބޯހިޔާވަހިކަން ފޯރުކޮށްދިނުމުގެ ބޭނުމުގައި އަޅަމުންދާ ފްލެޓު އެޅުމުގެ މަޝްރޫއު އާއި ގުޅިގެން ރައްޔިތުންގެ މަޖިލީހަށް ހުށައެޅި މައްސަލަ ދިރާސާކުރުމަށް ސްޓޭޓް އޯންޑް އެންޓަރޕްރައިޒެސް (އެސްއޯއީ) ކޮމިޓީއަށް ފޮނުވައިފިއެވެ.

ދާންދޫ ދާއިރާގެ މެމްބަރު ޔައުގޫބް އަބްދުﷲ ހުށައެޅުއްވި މި މައްސަލަ ކަމާބެހޭ ކޮމިޓީއަށް ދިރާސާ ކުރަން ފޮނުވުމަށް ހުށައެޅުއްވީ ތޮއްޑޫ ދާއިރާގެ މެމްބަރު ހަސަން ޝިޔާންއެވެ. މި ހުށައެޅުން ފެންނަ ކަމަށް 62 މެމްބަރުން ވޯޓުދެއްވިއެވެ.

ސިފްކޯ އަދި ޕޮލްކޯ މެދުވެރިވެގެން ސިފައިންނާއި ފުލުހުންނަށް ޚާއްސަކޮށްގެން އެފަރާތްތަކުގެ އާއިލާތަކަށް ބޯހިޔާވަހިކަން ފޯރުކޮށްދިނުމުގެ ބޭނުމުގައި ހުޅުމާލޭގައި އަޅަމުންގެންދާ 600 ފްލެޓަކީ 2013 ވަނަ އަހަރުން ފެށިގެން ކޮންޓްރެކްޓަރުންނާއި ހަވާލުކޮށްގެން ތަރައްގީކުރަމުންދާ ތަނެއްކަން ފާހަގަކުރައްވާ މައްސަލަ ހުށައަޅުއްވަމުން ޔައުގޫބް ވިދާޅުވީ މިއަދާ ހަމަޔަށް ވެސް ފްލެޓުތައް ނިމިފައި ނުވާކަމަށެވެ. އަދި ބެލެވޭ ގޮތުގައި އަވަސް މުއްދަތެއްގައި އެތަންތަން ނިމޭނެކަމަކަށް ވެސް ގަބޫލުނުކުރެވޭ ކަމަށެވެ.

ޔައުގޫބް ވިދާޅުވީ މި ފްލެޓުތައް ހަދަމުންގެންދަނީ ސަރުކާރުން ޚަރަދުކޮށްގެން ނުވަތަ ލޯނު ނަގައިގެން ކަމުގައި ވީނަމަވެސް ފްލެޓުތައް ލިބޭ ފުލުހުންނާއި ސިފައިން އެ ފްލެޓުތަކަށް ޑައުން ޕޭމެންޓްގެ ގޮތުގައި ފައިސާ ދައްކާފައިވާކަމަށެވެ.

މީގެ ތެރެއިން ބައެއް ސިފައިންނާއި ފުލުހުން މި ފައިސާ ދެއްކުމަށްޓަކައި ބޭންކުތަކުން ލޯނު ނަގާފައިވާއިރު އެ ފަރާތްތަކުން ނެގި ލޯނު ފައިސާ އަނބުރާ ދައްކަން ޖެހި، ދިރިއުޅެމުން ގެންދާ ތަނަށް ވެސް ކުލި ދައްކަން ޖެހިފައި ވުމުން އެކަން އެ ފަރާތްތަކަށް ބޮޑު ތަކުލީފަކަށްވެފައިވާ ކަމަށް ވެސް ޔައުގޫބް ވިދާޅުވިއެވެ.

މި ފްލެޓުތައް ނިންމުމަށް ފަހު ހަވާލުކުރަން ދިން މުއްދަތު އެތައް ފަހަރަކު ލަސްވެ، 24 މަސް ދުވަސް ތެރޭގައި ނިންމުމަށް އޮތް މުއްދަތަށް މިހާރު އަށް އަހަރު ވުމަކީ ކަބްބޮޑުވާކަމެއްކަން ފާހަގަކުރައްވާ އޭނާ ވިދާޅުވީ ޕޮލްކޯ އާއި ސިފްކޯއިން ކޮންޓްރެކްޓަރުންނަށް ދޭންޖެހޭ ޕޭމެންޓުތައް ދެމުންދާއިރު އެ ފްލެޓުތައް ނިންމާފައިވާ ނިސްބަތަށް ވުރެ ދައްކާފައިވާ ފައިސާ އިތުރުކަމަށް މައުލޫމާތު ލިބިފައިވާ ކަމަށެވެ.

އޭނާ އިތުރަށް ވިދާޅުވީ މި ފްލެޓުތައް ނިމިފައިނުވާ ހަގީގީ ސަބަބު ސާފުވުން މުހިއްމު ކަމަށާއި މި ޕްރޮޖެކްޓު ލަސްވެފައިވާއިރު، ޕްރޮޖެކްޓުގެ ކުރީގެ ސަބް ކޮންޓްރެކްޓަރަށް ކޮންޓްރެކްޓުކޮށް އަދި އެ ކޮންޓްރެކްޓު ދަމަހައްޓާ ސަބަބެއްވެސް ސާފެއް ނުވާކަމަށެވެ. އަދި މި ޕްރޮޖެކްޓު ލަސްވުމުގައި ސަރުކާރުގެ ނުވަތަ، ޕޮލްކޯ އަދި ސިފްކޯގެ ދައުރެއް އޮތްތޯ ބަލާ، ރަނގަޅު ކުރަންޖެހޭ ކަމެއް އޮތް ނަމަ، އެކަމެއް ރަނގަޅުކުރަން ޖެހޭ ކަމަށް ވެސް ވިދާޅުވިއެވެ.

ޔައުގޫބް ވިދާޅުވީ މި ޕްރޮޖެކްޓަށް އަށް އަހަރުވެގެން ދިޔައިރު ނުނިމުނީ ކީއްވެގެންތޯ އާއި އެކަން ރަނގަޅުކުރަން އެއްވެސް ފިޔަވަޅެއް ނޭޅުނީ ކީއްވެގެންތޯ އާއި ޕޮލްކޯ އަދި ސިފްކޯއިން ފައިސާ ދައްކަމުންދަނީ ކޮން އުސޫލެއްގެ ދަށުންކަން ސާފުވާން ޖެހޭ ކަމަށެވެ.

އޭގެ އިތުރުން، ޕްރޮޖެކްޓަށް ޑިއުޓީ ފްރީކޮށް ތަކެތި އެތެރެކުރުމުގައި ޖާއިޒު ނޫން މަންފާއެއް އެއްވެސް ފަރާތަކަށް ލިބިފައިވޭތޯއާއި ސިފްކޯ އަދި ޕޮލްކޯގެ އިސްވެރިން އެކި ފަހަރުމަތިން ކޮންޓްރެކްޓަރުގެ ހަރަދުގައި ދަތުރު ކޮށްފައިވޭތޯ އާއި އެފަދަ ދަތުރެއް ކޮށްފައިވާނަމަ އެއީ ކޮން އުސޫލެއްގެ ދަށުން ކޮށްފައިވާ ދަތުރުތަކެއްތޯ ބަލައިދިނުމަށް ވެސް އެދިފައިވެއެވެ.