ލޮކްޑައުން އަމުރާ ހިލާފުވި މީހުންގެ މައްޗަށް ދައުވާ ނުކުރަން ނިންމައިފި
21 ޖުލައި 2020 | އަންގާރަ 07:20ލޮކްޑައުން އަމުރާ ހިލާފުވެގެން ކޯޓަށް ހުށަހަޅާފައިވާ ދައުވާތައް އަނބުރާ ނަގައި، ފުލުހުންގެ އިދާރާއަށް އަނބުރާ ފޮނުވާލުން
ފުލުހުން މަގުމަތި ބަލަހައްޓަނީ: ގިނަ ބަޔަކު ލޮކްޑައުން އަމުރާ ހިލާފްވި، އަދި ގިނަ ބަޔަކު ޖޫރިމަނާ ވެސް ކުރި
ކޮވިޑް-19އާ ގުޅިގެން މާލޭ ސަރަހައްދަށް އިއުލާން ކުރި ފުރަބަންދާ ހިލާފުވި މީހުންގެ މައްޗަށް ދައުވާ ނުކުރަން ޕްރޮސިކިއުޓާ ޖެނަރަލް (ޕީޖީ) ނިންމައިފިއެވެ.
ޕީޖީ އޮފީހުން އަންގާރަ ދުވަހު ނެރެފައިވާ ނޫސްބަޔާނެއްގައި ވަނީ، ލޮކްޑައުން އަމުރާ ހިލާފްވެގެން ދައުވާކޮށް، ޝަރުއީ ކޯޓުތަކަށް ހުށަހަޅާފައިވާ މައްސަލަތައް އިތުރަށް ކުރިއަށް ނުގެންދިއުމަށް ނިންމައި، މައްސަލަތައް އަނބުރާ ގެނެސް، ފުލުހުންގެ މުއައްސަސާއަށް އަނބުރާ ފޮނުވާލުމަށް ނިންމާފައިވާ ކަމަށެވެ. އަދި ލޮކްޑައުން އަމުރާ ހިލާފުވެގެން ފުލުހުންގެ އިދާރާއިން ތަހުގީގުކޮށް، ޕީޖީ އޮފީހަށް ހުށަހަޅާފައިވާ މައްސަލަތަކުގައި ދައުވާ ނުކުރުމަށް ނިންމައި އަނބުރާ އެ މުއައްސަސާއަށް ފޮނުވާލުމަށެވެ.
ލޮކްޑައުންއާ ހިލާފުވި މީހުންނަށް ދައުވާ ނުކުރަން ނިންމި މައިގަނޑު ސަބަބެއް ކަމަށް ޕީޖީގެ އޮފީހުން ބުނެފައިވަނީ، ލޮކްޑައުންއާ ހިލާފު ވެގެން ފިޔަވަޅު އަޅާނަމަ އެންމެންނަށް ވެސް ފިޔަވަޅު އަޅަން ޖެހޭނީ ހަމަހަމަކަމާއެކު ކަމަށްވާތީ ކަމަށެވެ. އަދި ބައެއް މީހުން ލޮކްޑައުންއާ ހިލާފުވެފައި ވަނީ މަޖުބޫރު ވެގެން ކަމަށް ގަބޫލު ކުރެވޭތީ މިކަމުގައި ޖިނާއީ ކުށުގެ ރިކޯޑެއް އުފަން ކުރުމަކީ މުޖުތަމައުގެ އާންމު މަސްލަހަތު އޮތް ކަމެއް ނޫން ކަމަށް ދެކޭތީ ކަމަށެވެ.
އެހެންކަމުން، ޕީޖީ އޮފީހުގެ އެނިންމުމާ އެއްގޮތަށް، ލޮކްޑައުން އަމުރާ ހިލާފުވެގެން ޝަރުއީ ކޯޓުތަކަށް ހުށަހެޅި ޖިނާއީ އެންމެހައި ދައުވާތައް ކޯޓުން އަނބުރާ ގެނެސް ފުލުހުންގެ މުއައްސަސާއަށް އަނބުރާ ފޮނުވާލުމުގެ މަސައްކަތް ކުރަމުންދާ ކަމަށްވެސް ޕީޖީ އޮފީހުން ބުނެފައި ވެއެވެ.
ލޮކްޑައުން އަމުރާ ޙިލާފުވީ ފަރާތްތަކުގެ މައްޗަށް ދައުވާ ނުއުފުލަން ނިންމި ނަމަވެސް، ލޮކްޑައުން އަމުރާ ހިލާފުވެގެން ކޮށްފައިވާ ޖޫރިމަނާ ތަންފީޒުކޮށް، އެފައިސާ ހޯއްދެވުމަށް ދައުލަތުން ކުރަންޖެހޭ ކަންކަން ކުރުމަށް ދައުލަތުގެ މުއައްސަސާތަކުގައި ދެންނެވުމަށް ޕީޖީ އޮފީހުން ވަނީ ނިންމާފައެވެ.
