ކޮވިޑް-19އާ ގުޅިގެން ފްރޮންޓްލައިންގައި މަސައްކަތްކުރާ ފަރާތްތަކަށް ޚާއްސަ އެލަވަންސެއް ދިނުމަށް ސަރުކާރުން ނިންމާފައި ވީނަމަވެސް، މިހާތަނަށް އެއްވެސް ފަރާތަކަށް އެލަވަންސް ލިބިފައިނުވާތީ ހުށައެޅުނު މައްސަލަ މަޖިލީހުން ބޭރުކޮށްލައިފިއެވެ.
ނައިފަރު ދާއިރާގެ މެމްބަރު އަހުމަދު ޝިޔާމް ހުށައަޅުއްވާފައިވާ މައްސަލަ ބޭރުކޮށްލާފައިވަނީ 14 މެމްބަރުންގެ ވޯޓުންނެވެ.
ޝިޔާމް މި މައްސަލަ ހުށައަޅުއްވާފައިވަނީ ފްރޮންޓްލައިން ވަރކަރުންނަށް ޚާއްސަ އެލަވަންސް ދޭނެ ކަމަށް ސަރުކާރުން އިޢުލާންކޮށްފައި ވީނަމަވެސް މިހާތަނަށް އެއްވެސް ފަރާތަކަށް މި އެލަވަންސް ނުލިބި އެތައް ދުވަހެއް ފާއިތުވެގެން ދިއުމުގެ ސަބަބުން ކަމަށް ބަޔާންކޮށެވެ.
ފްރޮންޓްލައިން ވަރކަރުންނަށް ހާއްސަ އެލެވަންސެއް ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ނިންމެވިކަން އިއުލާނުކުރެއްވީ ނިމިދިޔަ މެއި މަހުގެ 7 ގައެވެ.
އެކަން އިއުލާނު ކުރައްވާ ދެއްކެވި ވާހަކައިގައި ފިނޭންސް މިނިސްޓަރ އިބްރާހިމް އަމީރު ވިދާޅުވީ ކޮވިޑާ ދެކޮޅަށް ކުރީ ސަފުގައި މަސައްކަތްކުރާ ފަރާތްތަައް ތިން ގިންތިއަކަށް ބަހާލައިގެން "ފްރޮންޓްލައިން" އެލަވަންސެއް ދިނުމަށް ނިންމާފައިވާ ކަމަށެވެ.
ޝިޔާމް ވިދާޅުވީ އަދިވެސް މި އެލަވަންސް ލިބިފައި ނުވާތީ ކޮވިޑް-19އާ ގުޅިގެން ފްރޮންޓްލައިންގައި ޙަރަކާތްތެރިވި ފަރާތްތަކުން ރައްޔިތުންނާއި ޤައުމަށްޓަކައި ފުރާނަ އަތް މައްޗަށް ލައިގެން ވަރަށް ބޮޑު ޤުރުބާނީއެއް ވެފައިވާއިރު، އެފަރާތްތަކަށް ލިބެންޖެހޭ އެލަވަންސް ވީހާވެސް އަވަހަށް ދިނުމަށް ސަރުކާރަށް ގޮވާލައްވާ ކަމަށެވެ.
ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފައިވަނީ ފްރޮންޓްލައިން ވަރކަރުންގެ އެލަވަންސް، ޖުލައި މަހުގެ މުސާރައާއެކު ޖަމާވާނެ ކަމަށެވެ.
