އިނގިރޭސި ޕްރިމިއާ ލީގުގައި ޓޮޓެންހަމް ހޮޓްސްޕާ އަތުން ލެސްޓާ ސިޓީ ބަލިވުމާއެކު، ގަދަ ހަތަރަކަށް ވާދަކުރަމުން އަންނަ މެންޗެސްޓާ ޔުނައިޓެޑާއި ޗެލްސީއަށް ހިތްހަމަޖެހުމެއް ލިބިއްޖެއެވެ.

ލީގުގައި އާދީއްތަ ދުވަހުގެރޭ ކުޅުނު މެޗުން ޓޮޓެންހަމް އަތުން ލެސްޓާ ބަލިވީ 3-0 ންނެވެ.

ލެސްޓާ ބަލިވުމުން ގަދަ ހަތަރެއްގެ ރޭހުގައި ޗެލްސީ އާއި ޔުނައިޓެޑަށް ހިތްހަމަޖެހުމެއް ލިބުނުއިރު، ލީގުގެ ތިންވަނައިގައި ޗެލްސީ މި ވަގުތު އޮތީ 36 މެޗުން 63 ޕޮއިންޓާއެކުއެވެ. ހަތަރުވަނައިގައި އޮތް ލެސްޓާއަށް 37 މެޗުން 62 ޕޮއިންޓު ލިބިފައިވާއިރު، ފަސްވަނައިގައި އޮތް ޔުނައިޓެޑަށް 36 މެޗުން ވަނީ 62 ޕޮއިންޓެވެ. ލެސްޓާ މި ވަގުތު ކުރީގައި އޮތީ ލަނޑުގެ ތަފާތުންނެވެ.

އެހެންކަމުން ލީގުގައި ބުދަ ދުވަހުގެރޭ ވެސްޓް ހޭމް ޔުނައިޓެޑް ބަލިކޮށް ތާވަލުގެ ހަތަރުވަނައަށް އެރުމުގެ ފުރުސަތު ޔުނައިޓެޑަށް އެބައޮތެވެ.

އާދީއްތަ ދުވަހުގެރޭ ޓޮޓެންހަމްގެ ދަނޑުގައި ކުޅުނު މެޗުގެ ވަރަށް ކުރީކޮޅު އެޓީމުން ވަނީ ލީޑު ނަގާފައެވެ. މި ލަނޑަކީ މެޗުގެ ހަވަނަ މިނެޓުގައި ލެސްޓާގެ ޖޭމްސް ޖަސްޓިން އަތުން ބައިކޮޅަށް ވަން ލަނޑެކެވެ. އަދި މެޗުގެ 37 ވަނަ މިނެޓުގައި ހެރީ ކޭން ޓޮޓެންހަމަށް ލީޑު ފުޅާކޮށްދިންއިރު، އޭގެ ތިން މިނެޓު ފަހުން ކޭން ވަނީ އިތުރު ލަނޑެއް ކާމިޔާބުކޮށްފައެވެ.

ލެސްޓާ އަތުން ހޯދި މޮޅާއެކު ޓޮޓެންހަމް އޮތީ ތާވަލުގެ ހަވަނައިގައި 37 މެޗުން 58 ޕޮއިންޓާއެކުއެވެ. ލީގުގައި ޓޮޓެންހަމް ކުޅޭ ފަހު މެޗުގައި މި މަހުގެ 26 ވަނަ ދުވަހު ރަށުން ބޭރުގައި ނުކުންނާނީ ކްރިސްޓަލް ޕެލަސްއާ ދެކޮޅަށެވެ.