މެންޗެސްޓާ ޔުނައިޓެޑާއެކު ޒުވާން ފޯވާޑް މޭސަން ގްރީންވުޑް ހަދައިފައިވާ އެއްބަސްވުން އާކުރުމުގެ މަސައްކަތް ފަށާފައިވާ ކަމަށް ރިޕޯޓުތައް ބުނެފިއެވެ.

ރިޕޯޓުތައް ބުނާ ގޮތުން ގްރީންވުޑްގެ އެއްބަސްވުން އާކުރުމަށް ޔުނައިޓެޑުން މަސައްކަތް ކުރަނީ އެކަމަށް އެޓީމުގެ ކޯޗު އޮލެ ގުނަ ސޯލްޝެއާގެ އެދުމުންނެވެ.

މި ސީޒަނުގައި ގްރީންވުޑް މޮޅު ކުޅުމެއް ދައްކަމުން އަންނައިރު، އޭނާއަށް އަލަށް ހުށަހަޅާ އެއްބަސްވުމާއެކު ގްރީންވުޑްގެ މުސާރަ ދެ ގުނައަށް އިތުރުވާނެ ކަމަށްވެސް ރިޕޯޓުތައް ބުނެއެވެ. އެގޮތުން އައު އެއްބަސްވުމާއެކު ގްރީންވުޑަށް ހަފުތާއެއްގެ މައްޗަށް 40،000 ޕައުންޑުގެ މުސާރައެއް ލިބޭނެ ކަމަށްވެސް ވަނީ ރިޕޯޓުކޮށްފައެވެ.

އުމުރުން މިހާރު 18 އަހަރުގެ ގްރީންވުޑް މި ސީޒަނުގައި ތަފާތު މޮޅު ކުޅުމެއް ދައްކަމުން އަންނައިރު، އޭނާ ވަނީ މި ސީޒަނުގައި ޔުނައިޓެޑަށް މިހާތަނަށް 16 ލަނޑު ކާމިޔާބުކޮށްދީފައެވެ. އެހެންކަމުން ގްރީންވުޑް ވެގެން ގޮސްފައިވަނީ ޖޯޖް ބެސްޓާއި، ވޭން ރޫނީ އަދި ބްރައިން ކިޑް އަށްފަހު ޒުވާން އުމުރުގައި ޔުނައިޓެޑަށް 16 ލަނޑު ޖަހައިދިން ފުރަތަމަ ކުޅުންތެރިޔާއަށެވެ.

2018 ވަނަ އަހަރު ޔުނައިޓެޑްގެ ސީނިއާ ސްކޮޑުން ޖާގަ ހޯދި ގްރީންވުޑަށް އެ އަހަރުގެ ސީޒަން ވެގެން ގޮސްފައިވަނީ ނާކާމިޔާބު ސީޒަނަކަށެވެ. އެ ސީޒަނުގެ ގިނަ މެޗުތަކުގައި ކުޅުމުގެ ފުރުސަތު ގްރީންވުޑަށް ނުލިބުނު ކަމުގައި ވިޔަސް، މި ސީޒަނުގައި ޔުނައިޓެޑްގެ ފުރަތަމަ އެގާރައިން ގްރީންވުޑް އަންނަނީ ބަރާބަރަށް ޖާގަ ހޯދަމުންނެވެ.