ފިހާރަތަކާއި ބޭންކުތަކުގައި މާސްކު އެޅުން ފްރާންސްގައި މަޖުބޫރުކުރަނީ
ހޯމަ ދުވަހުން ފެށިގެން ބޭންކުތަކާއި ފިހާރަތައް އަދި ބަންދުވެފައި ހުންނަ މާރުކޭޓްތަކުގައި މާސްކު އެޅުން މަޖުބޫރުވާނެ
ފްރާންސްގައި މީހުން މާސްކު އަޅައިގެން ހިނގާފައިދަނީ
ކޮވިޑް-19 ފެތުރޭތީ އެކަން ހުއްޓުވުމުގެ ގޮތުން ފްރާންސްގައި އާންމު އެއްވެއުޅޭ ބަންދުވެފައި ހުންނަ ތަންތަނުގައި މާސްކު އެޅުން މަޖުބޫރުކުރާނެ ކަމަށް އެގައުމުގެ ހެލްތު މިނިސްޓަރ ވިދާޅުވެއްޖެ އެވެ.
ހޯމަ ދުވަހުން ފެށިގެން ބޭންކުތަކާއި ފިހާރަތައް އަދި ބަންދުވެފައި ހުންނަ މާރުކޭޓްތަކުގައި މާސްކު އެޅުން މަޖުބޫރުވާނެ ކަމަށް އެގައުމުގެ ހެލްތު މިނިސްޓަރ ވިދާޅުވި އެވެ. މާސްކު އެޅުން މަޖުބޫރު ކުރަން މި ނިންމީ އެގައުމުގެ ދެކުނާއި ހުޅަނގުގެ ސަރަހައްދުތަކުން އަނެއްކާވެސް ވައިރަސް ޖެހިފައިވާ މީހުން ފެންނަން ފެށުމުންނެވެ.
ފްރާންސްގައި ހަލުވިކަމާއެކު މަރޗް މަހުން ފެށިގެން މެއި މަހާ ހަމައަށް ވަނީ ކޮވިޑް-19 ފެތުރިފައެވެ. ނަމަވެސް މެއި މަހުގެ ފަހުކޮޅުން ފެށިގެން ވައިރަސް ފެތުރޭ މިންވަރު ދަށްކުރެވި ފްރާންސް އިން ވަނީ ލޮކްޑައުންގައި އަޅާފައިވާ ފިޔަވަޅުތަކަށް ލުއިތައް ދީފަ އެވެ.
ފްރާންސްގައި 174,674 (އެއްލައްކަ ހަތްދިހަ ހަތަރު ހާސް ހަސަތޭކަ ހަތްދިހަ ހަތަރު) މީހުންނަށް ވައިރަސް ޖެހިފައިވާއިރު 30،152 މީހުން ވަނީ އެގައުމުގައި ވައިރަސް ޖެހިގެން މަރުވެފަ އެވެ.
