ފްރާންސްގައި ކުރި މުޒާހަރާ ތަކުގައި އެކަކު މަރުވެ 100 މީހުން ޒަހަމްވެއްޖެ

ފްރާންސްގައި ކުރި މުޒާހަރާ ތަކުގައި އެކަކު މަރުވެ 100 މީހުން ޒަހަމްވެއްޖެއެވެ.

ތެލުގެ އަގުބޮޑުވުމާއި ގުޅިގެން ނުރުހުން ފާޅުކޮށް ފްރާންސްގެ ވެރިރަށް ޕެރިހާއި އެ ޤައުމުގެ އެކި ސަރަހައްދު ތަކުގައި ހޮނިހިރު ދުވަހު ވަނީ މުޒާހަރާ ކޮށްފައެވެ. "ޔެލޯ ވެސްޓް"ގެ ނަމުން ނަންދީފައިވާ މުޒާހަރާގައި ބައިވެރިން ތިބީ ރީނދޫ ކުލައިގެ ޖެކެޓް ތަކެއް ލައިގެންނެވެ.

މުޒާހަރާގެ ބައިވެރިން ނުރުހުން ފާޅުކުރަމުން ދަނީ ޒަމަންތަކެއް ވަންދެން ސަރުކާރުން ޑީސެލް އުޅަނދުފަހަރު ގަތުމަށް ބާރުއެޅުމަށްފަހު 2019 ވަނަ އަހަރުން ފެށިގެން ޑީސެލްގެ އަގު ބޮޑުކުރަން ނިންމުމާއި ގުޅިގެންނެވެ. ފްރާންސްގައި މީހާރުވެސް ގިނައިން ބޭނުންކުރަމުން ދަނީ ޑީސެލް ބޭނުންކުރާ އުޅަނދުފަހަރެވެ.

ގްރީން ޓެކްސްގެ ދަށުން ފާއިތުވެދިޔަ އަހަރު ތެރޭގައިވެސް ރައީސް މެކްރޮން ވަނީ ޑީސެލްގެ އަގު ވިހި އިންސައްތަ ބޮޑުކޮށްފައެވެ. މުޒާހަރާގެ ބައިވެރިން ވަނީ މެކްރޮންގެ އިސްތިއުފާއަށްވެސް ގޮވާލާފައެވެ.

މުޒާހަރާގެ ބައިވެރިންނާއި ފުލުހުންނާ ދެމެދު ހިނގި ކުރިމަތިލުންތަކުގައި އެކަކު މަރުވެ ސަތޭކަމީހުން ޒަހަމްވެފައިވާ ކަމަށް ރިޕޯޓްތައް ބުނެއެވެ.

މުޒާހަރާ ކުރަމުން ދިޔަ މީހުން މެކްރޮންގެ ގެކޮޅާއި ދިމާލަށް މިސްރާބު ޖެހުމުން އެކަން ހުއްޓުވުމުގެ ގޮތުން ފުލުހުން ވަނީ ކަރުނަގޭސް ބޭނުންކޮށްފައެވެ.

ފްރާންސްގެ އިންޓީރިއާ މިނިސްޓްރީއާ ހަވާލާދީ އަލްޖަޒީރާއިން ބުނެފައިވަނީ، މި މުޒާހަރާގައި ފްރާންސްގެ އެކި ހިސާބުތަކުގައި 240،000 އަށް ވުރެ ގިނަމީހުން ބައިވެރިވެފަވާ ކަމަށެވެ. އަދި މިމުޒާހަރާ އާއި ގުޅިގެން 73 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

ފްރާންސްގައި މިހާރު ޑީސެލް ލީޓަރެއްގެ އަގު ހުރީ 1.51 ޔޫރޯއަށެވެ. މިއި ނިސްބަތުން ދުނިޔޭގެ ބާޒާރުގައި ޑީސެލްގެ އަގު ހުރި މިންވަރަށްވުރެ މަތީ އަގެކެވެ.