މިސްރު ގައި މޫނުބުރުގާ އެޅުން މާނާކުރަނީ!
މޫނު ބުރުގާ އަޅާ މީހުން 1000 އިޖިޕްޝަން ޕައުންޑުން ޖޫރިމަނާ ކުރާނެ
އަރަބި ގައުމެއްގައި މޫނު ބުރުގާ އަޅައިގެން ތިބި އަންހެނުންތަކެއް
މިސްރުގައި މޫނުބުރުގާ އެޅުން މަނާކުރުމުގެ ގޮތުން އެގައުމުގެ ޤާނޫނު ހަދާ މަޖިލީހުގައި ބަހުސްކުރަން ފަށައިފިއެވެ.
މިސްރުގައި މޫނު ބުރުގާ އެޅުން މަނާ ކުރުމަށް އެގައުމުގެ ގާނޫނު ހަދާ މަޖިލީހަށް ބިލެއް ހުށަހަޅުއްވާފައިވަނީ އެ މަޖިލީހުގެ މެމްބަރު ޣާދާ އަޖަމްއެވެ.
ޣާދާ ހުށަހެޅުއްވި ބިލުގައި ހިމަނާފައިވާ ކަންކަމުގެ ތެރޭގައި މޫނުބުރުގާ އަޅައިގެން އުޅޭ ފަރާތްތައް ޖުރިމަނާ ކުރުމަށް ވަނީ ހިމަނާފައެވެ. އެގޮތުން މޫނު ބުރުގާ އަޅާ މީހުން 1000 އިޖިޕްޝަން ޕައުންޑުން ޖޫރިމަނާ ކުރުމަށް އެ ބިލުގައި ހިމަނާފައިވެއެވެ.
ބިލު ހުށަހެޅުއްވި ޣާދާ ފާހަގަކުރައްވާ ގޮތުގައި މޫނުބުރުގާ އެޅުން މަނާ ކުރަން ޖެހޭ އެންމެ ބޮޑު އެއްސަބަބަކީ ޓެރަރިޒަމް އާއި ދެކޮޅަށް ކުރަމުންދާ ހަނގުރާމަ ނިމުމަކަށް ގެނައުމެވެ.
މި ބިލުގައިވާ ގޮތުން އާންމުން އެއްވެ އުޅޭ ތަންތަނުގެ އިތުރުން ސަރުކާރުގެ އިމާރާތްތަކުގައިވެސް މޫނުބުރުގާ އެޅުން މަނާ ކުރުމަށް ވަނީ ހިމަނާފައިވެއެވެ.
މޫނުބުރުގާ އަޅައިގެން މީހާ ނޭނގޭގޮތަށް ބައެއް ޓެރަރިސްޓުން ހަރަކާތްތެރިވެ، ކުށްކުރަމުންދާ ކަމަށާއި، މިބިލުގެ ސަބަބުން މިކަމަށް ނިމުމެއް އަންނާނެ ކަމަށް ބުނެ މިސްރުގެ ބައެއް ސިޔާސީ ފަރާތްތަކުން ވަނީ މި ބިލަށް ތާއިދުކޮށް ވާހަކަ ދައްކާފައެވެ.
މިސްރުން ޓެރަރިޒަމް ނައްތާލުމަށް ކުރަމުންދާ މަސައްކަތުގައި މިދިޔަ މަހު އެކަނިވެސް ވަނީ އައިސިސްގެ ނަމުގައި ހަރަކާތްތެރިވާ ހަނގުރާމަވެރި ދައީޝް ޖަމާއަތަށް ނިސްބަތްވާ 450 މީހުން މަރާލާފައެވެ. 2010 އިން ފެށިގެން ހުޅަނގުގެ ގިނަ ގައުމުތަކެއް ގައި ވަނީ މޫނު ބުރުގާއެޅުން މަނާކޮށްފައެވެ.
