އޭޝިއަން ސީނިއާސް އޮންލައިން ޗެސް ޗެމްޕިއަންޝިޕްގައި ރާއްޖޭގެ ހަތަރު ކުޅުންތެރިން

އޭޝިއަން ޗެސް ފެޑެރޭޝަނުން ފިޑޭ އަދި ޗެސް ޑޮޓްކޮމްއާ ގުޅިގެން ހިންގާ އޭޝިއަން ސީނިއާސް އޮންލައިން ޗެސް ޗެމްޕިއަންޝިޕް ހުކުރު ދުވަހު ފަށައިފިއެވެ.

މި މުބާރަތަކީ 50 އަހަރާއި 65 އަހަރުން މަތީގެ ކުޅުންތެރިންނަށް ހާއްސަކޮށްގެން ބާއްވާ އޮންލައިން ފުރަތަމަ ރާޒުވާ މުބާރާތެވެ. ޒޯން ތަކަކަށް ބަހާލައިގެން ކުރިއަށްގެންދާ މި މުބާރާތުގައި ރާއްޖެ ހިމެނިފައިވަނީ ޒޯން 3.2 ގައެވެ. ރާއްޖޭގެ އިތުރުން މި ޒޯންގައި ހިމެނިފައިވަނީ ބަންގްލަދޭޝް އާއި، ބޫޓާނާއި، ނޭޕާލާއި، ޕާކިސްތާން އަދި ސްރީލަންކާއެވެ.

ދެ އުމުރުފުރައަކަށް ބަހާލައިގެން ކުރިއަށްގެންދާ މި މުބާރާތުގައި ރާއްޖެއިން ޖުމްލަ ހަތަރު ކުޅުންތެރިން ވާދަކުރެއެވެ. އެއީ 50 އަހަރުން މަތީގެ އުމުރުފުރާގައި ތިން ކުޅުންތެރިންނާއި 65 އަހަރުން މަތީގެ އުމުރުފުރާގައި އެއް ކުޅުންތެރިއެކެވެ.

މި މުބާރާތުގައި މުޅި ޖުމްލަ 141 ކުޅުންތެރިން 50 އަހަރުން މަތީގެ އުމުރުފުރާގައި ބައިވެރިވެފައިވާއިރު، 65 އަހަރުން މަތީގެ އުމުރުފުރާގައި 44 ކުޅުންތެރިން ވާދަކުރެއެވެ.

ހުކުރު ދުވަހު ބޭއްވި ޒޯން 3.2 ގެ މެޗުތަކުގައި ބައިވެރިވެ 50 އަހަރުން މަތީގެ އުމުރުފުރާގައި ރާއްޖޭގެ އަބްދުއް ރަހްމާން އަލީ ގަދަ ހަޔަކަށް ހޮވިފައިވާއިރު، ގައުމުތަކުގެ ތެރެއިން ރާއްޖެ ވަނީ ތިންވަނައިގައި ހިމެނިފައެވެ.

އަންނަ އަންގާރަ ދުވަހުގެ ނިޔަލަށް ކުރިއަށްދާ މި މުބާރާތުގެ ފައިނަލް މެޗުތައް ކުޅުމަށް ހަމަޖެހިފައިވަނީ ހޯމަ އަދި އަންގާރަ ދުވަހުއެވެ.