ފަސް އަހަރަށް ފަހު ކަސިއަސް އެނބުރި ރެއާލަށް

ކުރީގެ ގޯލްކީޕަރު އިކާ ކަސިއަސް ފަސް އަހަރަށް ފަހު އެނބުރި ރެއާލް މެޑްރިޑާ ގުޅިއްޖެއެވެ.

ކަސިއަސް ރެއާލާ ގުޅުނީ އެ ކްލަބުގެ ރައީސް ފްލޮރެންޓީނޯ ޕެރޭޒްގެ އެޑްވައިޒަރެއްގެ ގޮތުންނެވެ. ރެއާލްގައި 16 އަހަރު ހޭދަކުރުމަށްފަހު، 2015 ވަނަ އަހަރު ކަސިއަސް ރެއާލް ދޫކޮށްލީ އޭރުގެ ކޯޗު ހޯސޭ މޮރީނިއޯގެ އިތުރުން ކްލަބުގެ މެނޭޖުމަންޓާއި ޖެހުނު މައްސަލައަކަށް ފަހުގައެވެ.

ރިޕޯޓުތައް ބުނާ ގޮތުން ޕެރޭޒްގެ އެޑްވައިޒަރުގެ މަގާމަށް ކަސިއަސް އައްޔަންކުރީ މުސްތަގުބަލުގައި ކަސިއަސްއަކީ ސްޕެއިންގެ ފުޓުބޯޅައިގައި ނުފޫޒު ގަދަ މީހަކަށް ވާނެތީ އާއި އޭނާ އަކީ ރެއާލްގެ ހާލަތު ދަންނަ މީހަކަށް ވުމުންނެވެ. މީގެ އިތުރުން ރެއާލުން އަންނަނީ އެކްލަބުގެ ލެޖެންޑުން، ކްލަބާ ގާތުން މަސައްކަތް ކުރުމަށް ފުރުސަތުތަކެއް ހުޅުވާލަމުންނެވެ.

މިއަހަރުގެ ފެބްރުއަރީ މަހުގެ ތެރޭގައި ސްޕެއިންގެ ފުޓްބޯޅަ އިދާރާގެ ރައީސްގެ މަގާމަށް ކުރިމަތިލާނެކަން އިއުލާންކުރި ކަސިއަސް، ކޮވިޑް-19 ގެ ސަބަބުން ކެމްޕެއިންކުރަން ވަގުތު ނުވާނެ ކަމަށް ބުނެ ފަހުން ވަނީ ނަން އަނބުރާ ގެންގޮސްފައެވެ.

އުމުރުން 39 އަހަރުގެ ކަސިއަސް މިހާރު ކުޅެމުން އަންނަނީ ޕޯޗުގަލްގެ ޕޯޓޯއަށެވެ. މިދިޔަ އަހަރު މެއި މަހު ޕޯޓޯގެ ފަރިތަކުރުންތަކުގެ ތެރެއިން ކަސިއަސްއަށް ހާޓްއެޓޭކެއް ޖެހިގެން ހޮސްޕިޓަލުން ފަރުވާ ހޯދިއިރު، ދެ މަސް ފަހުން އަލުން ފަރިތަކުރުންތަކަށް ނުކުތް ނަމަވެސް، ފަހުން އޭނާ ކުޅުމުގައި އެއްކޮށް ބައިވެރިއެއް ނުވެއެވެ. އެކަމަކު ރަސްމީކޮށް އަދި ކުޅުން ހުއްޓާލިކަން ކަސިއަސް އިއުލާން ކޮށްފައެއް ނުވެއެވެ.

ރެއާލް މެޑްރިޑަށް ގިނަ އަހަރުތަކެއް ވަންދެން ކުޅުނު ކަސިއަސް އަކީ 2010 ވަނަ އަހަރު ސްޕެއިނުން ފުރަތަމަ ފަހަރަށް ވޯލްޑް ކަޕް ތަށި އުފުލާލިއިރު، އެޓީމުގެ ކެޕްޓަނެވެ. އަދި ކަސިއަސް ވަނީ ސްޕެއިންއާއެކު ދެފަހަރު ޔޫރޯ ފުޓްބޯޅަ މުބާރާތްވެސް ކާމިޔާބުކޮށްފައެވެ. މީގެ އިތުރުން އޭނާ ވަނީ ރެއާލްއާއެކު ޖުމްލަ 19 ތަށި ހޯދާފައެވެ.