ވައިގަދަވުމާ ގުޅިގެން ކުރީގެ ޒުވާނުން މަރުކަޒުގައި ހުރި ގަސްތަކެއް ވެއްޓި ކާރުތަކަށް ގެއްލުން ވެއްޖެ
18 ޖުލައި 2020 | ހޮނިހިރު 04:35މާލޭގެ އެކި ހިސާބުތަކަށް ގަސްތައް ވެއްޓިފައިވޭ
ވައިގަވުމުން ކާރު މައްޗަށް ގަސްވެއްޓިފައި
ވައިގަދަވުމާ ގުޅިގެން ކުރީގެ ޒުވާނުން މަރުކަޒުގައި ހުރި ބޮޑެތި ގަސްތަކެއް ވެއްޓި ޕާކުކޮށްފައިވާ ކާރުތަކަށް ގެއްލުން ވެއްޖެއެވެ.
ރާއްޖެއަށް މިހާރު ކުރަމުންދާ ވިއްސާރާގައި ވައިގަދަވެ މާލެ އެކި ހިސާބުތަކުން ގަސްތައް ވެއްޓިފައިވެއެވެ.
އެގޮތުން ކުރީގެ ޒުވާނުން މަރުކަޒުގައި ހުރި ގަސްތައް މަޖީދީ މަގަށް ވެއްޓި ޕާކުކޮށްފައިވާ ބައެއް ކާރުތަކަށް ވަނީ ބޮޑެތިޮ ގެއްލުން ތަކެއް ވެފައެވެ. ފޮޓޯތަކުން ފެންނަ ގޮތުގައި ޕާކު ކޮށްފައިވާ ކާރެއްގެ ކުރީ ކޮޅު ވަނީ ވަރަށް ބޮޑަށް ހަލާކުވެފައެވެ.
މޫސުމާ ބެހޭ ގައުމީ އިދާރާއިން ކުރިއަށް އޮތް 24 ގަޑިއިރު މޫސުން ލަފާ ކުރާ ގޮތަށް ބަލާއިރު، ރާއްޖޭގެ ބޮޑު ބަޔަކަށް ވިއްސާރަކުރާނެ އަދި ބައެއް ރަށްތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާކޮށްފައިވެއެވެ.
މޫސުމާ ބެހޭ ގައުމީ އިދާރާއިން ބުނީ ހުޅަނގުއުތުރާއި އުތުރުން، އުތުރާއި މެދުރާއްޖެތެރޭގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރު މިނުގައި، އަދި ދެކުނުގެ އަތޮޅުތަކަށް ހުޅަނގުއުތުރާއި އުތުރުން ގަޑިއަކު 8 މޭލާއި 18 މޭލާ ދެމެދުގެ ބާރު މިނުގައި ވައި ޖެހޭނެ ކަމަށެވެ. އަދި ވިލާގަނޑުގައި ގަޑިއަކު ގާތްގަނޑަކަށް 45 މޭލުގެ ބާރުމިނަށް ވައި ގަދަވުން އެކަށީގެން ވާ ކަމަށް މޫސުމާ ބެހޭ ގައުމީ އިދާރާއިން ބުނެއެވެ.
މީގެ އިތުރުން މޫސުމާ ބެހޭ ގައުމީ އިދާރާއިން ބުނީ ކަނޑުތައް އުތުރާއި މެދުރާއްޖެތެރޭގައި ގަދަ ވާނެ އަދި ދެކުނުގައި އާދައިގެވަރަކަށް ގަދަވެފައި ވިލާގަނޑުގައި ގަދަވާނެ ކަމަށެވެ.
ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދަ އެރުުމުގެ ފުރުސަތު ބޮޑު ކަމަށް ވެސް މޫސުމާ ބެހޭ ގައުމީ އިދާރާއިން ބުނެއެވެ.
ހުރިހާ ފަރާތްތަކުންވެސް މޫސުމަށް ސަމާލުވުމަށް މުސުމާ ބެހޭ ގައުމީ އިދާރާއިން ވަނީ އިލްތިމާސްކޮށްފައެވެ.
