ކޮނޑޭގައި ދަނޑުވެރިކަން ނުކުރާ ދަނޑުތައް ބާތިލް ކުރުމަށް ނިންމައިފި
ދަނޑުބިން ސަރަހައްދުން ދޫކޮށްފައިވާ ދަނޑުބިން ތަކުގެ ތެރެއިން ގިނަ ދަނޑު ބިން ތަކުގައި މަސައްކަތެއް ނުކުރޭ
ރަށެއްގައި ހައްދާފައިވާ ކިއުކަންބާ ވެލެއް، ދަނޑުވެރިކަން ކުރަން ބޭނުންވާ މީހުންނަށް ފުރުސަތު ދޭން ބޭނުންވާ ކަމަށް ކައުންސިލުން ބުނޭ
ގއ. ކޮނޑޭގައި ދަނޑުވެރިކަން ނުކުރާ ދަނޑުތައް ބާތިލް ކުރުމަށް އެ ރަށުގެ ކައުންސިލުން ނިންމައިފިއެވެ.
ކޮނޑޭ ކައުންސިލުން ބުނީ ދަނޑުބިން ސަރަހައްދުން ދޫކޮށްފައިވާ ދަނޑުތަކުގެ ތެރެއިން ގިނަ ދަނޑު ބިން ތަކުގައި މަސައްކަތް ނުކޮށް ދަނޑުބިންތައް ދޫކޮށްލާފައި ހުރުމުން، ދަނޑު ބިމަށް އެދޭ ފަރާތްތަކަށް ދަނޑު ދޫކުރުމުގައި ދަތިވަމުންދާ ކަމަށެވެ.
ކޮނޑޭ ކައުންސިލުން ބުނީ ދަނޑުވެރިކަމަށް ޝައުގުވެރިވެ ދަނޑުވެރިކަން ކުރާ ފަރާތްތަކަށް އެ ދަނޑުބިންތަކުގެ ސަބަބުން ދަތިތަކާއި ކުރިމަތިލާން ޖެހިފައިވާތީ، ދަނޑުވެރިކަމަށް ޝައުގުވެރިވެ ދަނޑުވެރިކަން ކުރަން ބޭނުންވާ ފަރާތްތަކަށް ދަނޑުވެރިކަން ކުރުމުގެ ފުރުސަތު ތަނަވަސް ކޮށްދޭން ބޭނުންވާ ކަމަށެވެ.
އެގޮތުން ދަނޑު ބިން ދޫކުރި ފަހުން 1 އަހަރު ދުވަހަށްވުރެ ގިނަ ދުވަސް ވެފައިވާ ދަނޑު ބިންތަކުގެ ތެރެއިން ދަނޑުވެރިކަން ނުކޮށް 6 މަސް ދުވަސް ފާއިތުވެފައިވާ ދަނޑު ބިންތަކުގައި ދަނޑުވެރިކަން ފެށުމަށް 1 މަސްދުވަހުގެ މުއްދަތެއް ދީފައިވާ ކަމަށެވެ. އަދި ދަނޑުވެރިކަމުގެ އަމަލީ މަސައްކަތް ނުފަށާ ދަނޑުބިންތައް ބާތިލް ކުރުމަށް ކައުންސިލުން ނިންމާފައިވާ ކަމަށެވެ.
ކައުންސިލުން ބުނީ ދަނޑުބިން ދޫކުރިފަހުން 1 އަހަރު ދުވަސް ހަމަވެފައިވާ ދަނޑުބިންތަކުގެ ތެރެއިން ދަނޑުވެރިކަން ނުކޮށް 6 މަސް ދުވަސް ފާއިތުވެފައިވާ ދަނޑުބިމުގައި ދަނޑުވެރިކަން ފެށުމަށް މި މަހުގެ 15 އިން ފެށިގެން އެއް މަސްދުވަހުގެ މުއްދަތެއް ދީފައިވާ ކަމަށެވެ.
