ގެއްލުނު ޝާހުއާ އެންމެ ފަހުން ވާހަކަ ދެކެވުނީ ދޯނި ލެފުމުގެ 30 މިނިޓް ކުރިން: ކައްޕި
17 ޖުލައި 2020 | ހުކުރު 04:38ގެއްލިގެން ހޯދަނީ އުމުރުން 27 އަހަރުގެ މީހެއް
ޝާހު ހޯދުމުގެ މަސައްކަތުގައި ކޯސްޓްގާޑްގެ ޑައިވަރުން ހަރަކާތްތެރިވަނީ
މާލެ އިން ފުރައިގެން އދ. މަންދޫ އަށް ދަތުރުކުރި އެ ރަށު ''ރަންތަރި'' ދޯނިން ކަނޑުމައްޗަށް ގެއްލުނު މީހާއާ އެންމެ ފަހުން ވާހަކަ ދެކެވުނީ ބުރާސްފަތި ދުވަހުގެރޭ ދަންވަރު 12:45 ހާއިރު، ފަޅަށް ވަނުމުގެ ތިރީސް މިނިޓް ކުރިން ކަމަށް އެ ދޯނީގެ ކައްޕި ބުނެފިއެވެ.
ގެއްލިގެން ހޯދަމުން ދަނީ އދ.މަންދޫ، ރަތްވިލާގެ އުމުރުން 27 އަހަރުގެ އަލީ ޝާހު އެވެ. ޝާހު ގެއްލުނު ކަމުގެ ރިޕޯޓް އެމްއެންޑީއެފް އަށް ލިބިފައިވަނީ 02:10 ހާއިރުއެވެ. ޝާހުއާ އެކު އިތުރު ދެ އަންހެނުންނާއި ތިން ކުދިން ދަތުރުކުރި ދޯނީގެ ކައްޕި އަބްދުއްރަހްމާން އިބްރާހިމް ރާއްޖެ.އެމްވީ އަށް ބުނީ، މާލޭ އެއާޕޯޓް ޖެޓީން ދޯނި ފުރީ ބުރާސްފަތި ދުވަހުގެ ރޭ ހަތެއް ޖެހިހާއިރު ކަމަށެވެ. އިބްރާހިމް ބުނީ، ދޯނީގައި ޝާހު ނެތްކަން އެނގުނީ ދޯނި ފާލަމަށް ކައިރި ކުރުމުން ކަމަށެވެ.
ދޯނި ރަށަށް ލަފާފާއި ވަނީ 01:15 އާއި 01:20 ދެމެދުގެ ވަގުތެއްގައެވެ. އެންމެ ފަހުން ޝާހުއާ ބައްދަލުވެފައިވަނީ ކޮންއިރަކުންތޯ ސުވާލުކުރުމުން ކައްޕި ބުނީ، 00:45 ހާއިރު ވާހަކަ ދެކެވުނު ކަމަށާއި، ޝާހު ހުރީ ދޯނީގެ އެންމެ ފަހަތު ސީޓު ބަރީގައި ކޮޅަށް ކަމަށެވެ.
އެއީ ކަރަންޓީނަށްދާ މީހަކަށް ވުމުން އެމީހާއާ އެހާ ގާތްވެ އިބްރާހިމް ވާހަކައެއްް ނުދައްކައެވެ.
ދަތުރު ފެށިއިރު ކަނޑުވެސް އާދައިގެ ވަރަކަށް ރަނގަޅު ކަމަށްވާއިރު، ޝާހު ކަނޑަށް ވެއްޓެން ވި ސަބަބެއް އެއްވެސް ގޮތަކަށް ނޭގޭ ކަމަށް ދޯނީގެ ކައްޕި ބުންޏެވެ.
ޝާހު ލައިގެން ހުރީ މުށިކުލައިގެ ގޮޅިޖެހި އަތްދިގު ގަމީހަކާއި އަޅިކުލައިގެ ޖިންސެއްކަމަށް ކެޕްޓަނާއި ހަވާލާދީ އެމްއެންޑީއެފްގެ ކޯސްޓްގާޑުން ވަނީ މައުލޫމާތު ދީފައެވެ. އޭނާ ހޯދުމަށް ކޯސްޓުގާޑްގެ ޑައިވަރުން ދަނީ ކަނޑުގެ ސާފޭސް ބަލަމުންނެވެ. އެކަމަކު އަދި މިހާތަނަށް އޭނާ ނުފެނެއެވެ.
